باوكی ئەو كچەی لە تەمەنی هەشت ساڵیدا دەستدرێژیی كرابوە سەر و بەهۆی هەڕەشە و مەترسی لەسەر ژیانیان، هەولێریان بەرەو سلێمانی بەجێهێشت، داوا دەكەن كەیسەكەیان بگوازرێتەوە بۆ دادگاكانی سلێمانی.
لوقمان ئیسماعیل باوكی ئەو كچە قوربانیەی لە هەولێر لەلایەن چەند كەسێكەوە ڕفێندرا و پاشان دەستدرێژیی كرایەسەر، ماوەی هەفتەیەكە زێدی خۆی بەجێهیشتووە و لە سلێمانی نیشتەجێبوون، قسەی بۆ ئاژانسی هەواڵی رۆژنیوز كردووە، دەڵێت، بەردەوام لەلایەن ئەو كەسانەی ناویان لەو كەیسەدا هاتووە، هەڕەشەیان لێدەكرێت و دوای رووداوەكە چەند جارێك هەوڵی رفاندنی كچەكە و كوشتنی خۆشیان داوە، هەربۆیە بە ناچاریی هەڵاتوون بۆ شاری سلێمانی، بەڵام ئێستاش لەڕێگای تەلەفۆنەوە هەڕەشەیان لێدەكرێت.
باوكی كچەكە لەڕێی پارێزەرەكەیەوە داوای پێداچونەوەی بڕیاری دادگای هەولێر دەكات، داواش دەكات كەیسەكەی لە هەولێرەوە بۆ بگوازنەوە دادگاكانی سلێمانی.
هەر لەسەر ئەو پرسە، گروپی ویژدان لە بەردەم دادگای سلێمانی دژی ئازادكردنی تۆمەتباران و فشارخستنەسەر باوكی كچە هەشت ساڵانەكەی هەولێر گردبوونەوە، دۆسێكەیان بە پەڵەیەكی رەش بە ناوچاوانی دەسەڵات وەسفكرد، دەشڵێن، دادگا و داواكاری گشتی بەرپرسیارێتیی ئەخلاقیان دەكەوێتە سەرشان و پێویستە هەڵوێستیان هەبێت.
