بەپێی لێكۆڵینەوەیەكی نوێی زانایان، لەناو چوار هەزار و 500 هەسارەدا، كە تائێستا ناسراون، 24یان هاوشێوەی زەوین و لەوانەیە بۆ ژیان ببن.
زانایانی زانكۆی ویلایەتی واشنتۆنی ئەمریكا بڵاویانكردوەتەوە، 24 هەسارە لەنێو ئەو چوار هەزار و 500 هەسارە ناسراوەدا تائێستا لەوانەیە بۆ ژیان ببن، ئەو هەسارانە لە زەوی كۆنتر و گەورەترن و شێیان زیاترە و لە زەوی گەرمترن.
رونیشكراوەتەوە، ئەو دۆزینەوەیە هۆكارێكی یارمەتیدەرە بۆ گەشەی ژیان بە هەموو شێوەكانیەوە، سەرەڕای ئەوەی ئەو هەسارانە 100 ساڵی روناكی لە زەوییەوە دورن، دۆزینەوەكە لەوانەیە رێگە بەرەو خەونی دۆزینەوەی ژیان لەسەر هەسارەكانی تر خۆشبكات.
لای خۆیشیەوە شۆڵز موكش ئامادەكاری سەرەكیی لێكۆڵینەوەكە، بەپێویستی دەزانێت، تەلسكۆبە ناودارەكانی جیهان تەركیز لەسەر ئەو هەسارانە بكەن بۆ هەڵسەنگاندنی بەرگی دەرەوەیان، ئەوەی كە بۆ ژیان گونجاو بێت مەرج نییە ژیان لەسەر ئەو هەسارانە هەبێت، واتای ئەوەیە بارودۆخیان گونجاوە بۆئەوەی هاوكاربن بۆ ژیان.
