رێواز فایەق سەرۆكی پەرلەمانی كوردستان جەختدەكاتەوە، یاداشتی پرساندنی سەرۆكی حكومەت و جێگرەكەی و وەزیری داراییان واژۆكردوە و ناردویانە بۆ ئەنجومەنی وەزیران، بۆیە ئێستا چاوەڕێی وەڵامیان دەكەن.
سەرۆكی پەرلەمان لە دیمانەیەكی ئاژانسی ئەنادۆڵدا وتویەتی “بەگوێرەی پەیڕەوی ناوخۆی پەرلەمانی كوردستان، دەبێت لە ماوەی 14 رۆژدا، ئەنجومەنی وەزیران وەڵاممان بدەنەوە، كە ئایا لەسەر ئەو یاداشتە و ناوەڕۆكەكەی بۆچونیان چۆنە؟ ئایا خۆیان دێن ئایا نایەن؟ ئایا وەڵامێكیان هەیە بۆ ئەو پرساندنە یان نا؟ ئێمە چاوەڕێی ئەوان دەكەین، دوای ئەوەی وەڵامی ئەوانمان پێدەگات، پەیڕەو چیمان لەسەر دابنێت، ئەوە دەكەین”.
سەبارەت بە دانیشتنەكەی چەند رۆژی رابردوش، كە سەرۆكایەتی حكومەت چونە پەرلەمان، رێواز فایەق بە هەنگاوێكی باشی دەزانێت و دەڵێت “دەبوو شەش بۆ حەوت مانگ پێش ئێستا ئەو كۆبونەوەیەمان بكردایە، باوەڕم وایە ئەگەر شەش مانگ پێش ئێستا ئەو كۆبونەوەیەمان بكردایە هەم پەیوەندییەكانمان باشتر دەبوو هەم زۆر گرێ كرابونەوە، هەرچەندە ئێمە بە شەخسی خۆمان پەیوەندیمان باشە وەك سەرۆكایەتییەكان، بەڵام دەمانەوێت ئەو پەیوەندییە و ئەو متمانەیە لەنێوان حكومەت و تەواوی پەرلەمانتارانیشدا هەبێت بە فراكسیۆنەكانی ئۆپۆزسیۆن و دەسەڵاتیشەوە”.
هەروەها دوپاتیدەكاتەوە، كە قاچاخچێتی لە دەروازە سنورییەكاندا هەیە و دووجاریش راپۆرتیان بۆ چوە لەسەر خاڵە سنورییەكان، بەڵام رەتیدەكاتەوە لێكۆڵینەوە لەو بابەتە دوو ئیدارەیی و شەڕی ناوخۆی لەسەر دروست ببێت، چونكە پێیوایە قەوارەی سیاسیی هەرێمی كوردستان و سەقامگیریی و یەكگرتوویی هەرێم لە هەموو بەرژەوەندییەكان باڵاترە.
