دۆناڵد ترامپ سەرۆكی ئەمریكا بانگەشەی ئەوە دەكات بەتەواوی لە ڤایرۆسی كۆرۆنای نوێ رزگاری بووە و ئامادەیە بۆ كارەكانی بانگەشەی هەڵبژاردن و ركابەریكردنی جۆ بایدن كاندیدی دیموكراتەكان.
شەوی یەك لەسەر دووی ئەم مانگە، دۆناڵد ترامپ توشبونی خۆی و هاوسەرەكەی بە ڤایرۆسی كۆرۆنای نوێ راگەیاند و گواسترایەوە بۆ نەخۆشخانە، دوای سێ رۆژ لە وەرگرتنی چارەسەر نەخۆشخانەی بەجێهێشت.
كەمتر لە مانگێك ماوە بۆ هەڵبژاردنە سەرۆكایەتییەكەی ئەمریكا، كە بڕیارە لە سێی مانگی داهاتو ئەنجامبدرێت و ئەوەش وایكردوە ركابەری نێوان كاندیدەكان توندتر ببێتەوە و كۆكردنەوەی كۆمەكی داراییش بەشێكە لە ركابەرییەكان، كە تێیدا جۆ بایدن لە پێش دۆناڵد ترامپ-ەوەیە.
بەگوێرەی زانیارییە رۆژنامەوانییەكان، تائێستا 708 ملیۆن و 500 هەزار دۆلار پێشكەشی هەڵمەتی بانگەشەكانی بایدن كراوە و لە بەرانبەردا 595 ملیۆن دۆلار كۆمەكی دارایی پێشكەشی هەڵمەتی بانگەشەكانی ترامپ كراوە.
گروپە سیاسییەكان گەورەترین كۆمەكی داراییان پێشكەشی هەڵمەتەكانی بایدن كردوە، كە زیاتر لە 81 ملیۆن دۆلارە. لە دوای ئەوانیش خانەنشینان دێن بە بڕی نزیكەی 54 ملیۆن دۆلار.
بەهەمان شێوە زۆرترین ئەو هاوكارییانەی پێشكەشی هەڵمەتی بانگەشەكانی ترامپ كراون لەلایەن خانەنشینانی ئەمریكاوە بوە، كە بڕی 127 ملیۆن و 700 هەزار دۆلارە.
