بانكى ناوه‌ندیى ئێران ئاشكرایكرد، قه‌باره‌ى پاره بلۆككراوه‌كانى له عیراق به‌هۆى سزاكانى ویلایه‌ته یه‌كگرتوه‌كانى ئه‌مریكاوه زیاتره له 5 ملیار دۆلار.
له چه‌ند رۆژی رابردودا عه‌بدولناسڕ هیممه‌تى پارێزگارى بانكى ناوه‌ندیى ئێران سه‌ردانى عیراقى كردو رێككه‌وتن ئه‌و پاره بلۆككراوانه‌ى وڵاته‌كه‌ى له عیراق هه‌یه‌تى، به‌كاربهێنرێت بۆ كڕینى كاڵا و ده‌رمان له عیراق.
ئاژانسى هه‌واڵى فارس بڵاویكردوه‌ته‌وه، عه‌بدولناسڕ هیممه‌تى له‌باره‌ى سه‌ردانه‌كه‌یه‌وه له دانیشتنى ئه‌نجومه‌نى وه‌زیرانى وڵاته‌كه‌ى وتویه‌تى، سه‌ردانه‌كه سه‌ركه‌وتو بوه و هیوا هه‌یه سود له‌و پاره‌یه‌ى وڵاته‌كه‌ى وه‌ربگرن.
سه‌باره‌ت به قه‌باره‌ى ئه‌و پارانه‌ش (كه به‌هۆى سزاكانى ئه‌مریكاوه بۆسه‌ر تاران بلۆككراون) هیممه‌تی ئاشكرایكردوه، پاره‌كه زیاتره له 5 ملیار دۆلار.
به‌پێى راپۆرته رۆژنامه‌وانیه‌كان، ئه‌مریكا هه‌وڵى ئه‌وه ده‌دات ئه‌و رێككه‌وتنه بوه‌ستێنێت و بۆ ئه‌وه‌ش هه‌ڕه‌شه‌ی سه‌پاندنى سزا به‌سه‌ر عیراقدا ده‌كات و ماوه‌ى رێگه‌پێدان بۆ كڕینى وزه‌ش له ئێران درێژناكاته‌وه.
