وەزیری خوێندنی باڵا: بەهیچ شێوەیەك پلانی ئەوەمان نییە خوێندنی ئەمساڵ بفەوتێت

لەگەڵ جەختكردنەوە لە بەردەوامیی خوێندنی ئەمساڵ، ئارام محەمەد وەزیری خوێندنی باڵا و توێژینەوەی زانستیی هەرێمی كوردستان دەڵێت “چەند بژاردەیەكمان لەبەردەستە و بارودۆخی كۆرۆنا بڕیار لە خوێندنی ناو كەمپەسەكان لە زانكۆ و پەیمانگاكان دەدات”.
ئارام محەمەد لە پرێس كۆنفرانسێكدا ئاماژەی بەوەداوە، هەمو هەوڵێك دەدەن خوێندنی ئەمساڵ نەفەوتێت و چەند بژاردەیەكیشیان لەبەردەستە، بەڵام چاوەڕوانی بارودۆخی كۆرۆنان لە هەرێمدا، لەگەڵ وەزارەتە پەیوەندیدارەكانی حكومەتیش لەگفتوگۆی بەردەوامدان تا رێگەچارەیەك بۆ خوێندنی ئەمساڵ بدۆزنەوە، سەرەڕای ئەوەش بەهیچ شێوەیەك پلانی ئەوەیان نییە خوێندنی ئەمساڵ بفەوتێت.
رونیشیكردەوە، دوو رێگە هەیە بۆ بەردەوامبونی خوێندنی ئەمساڵ لە زانكۆ و پەیمانگاكاندا، یەكەمیان: خوێندنی ناو كەمپەسەكان، كە ئەوەش بارودۆخەكە بڕیاری لێدەدات. دووەمیان: خوێندنی ئۆنلاین، بەڵام لەئێستادا وەك وەزارەت خوێندنی ئاوێتەیان پێ باشە تا خوێندن بە ئۆنلاین و لەناو كەمپەسەكان تەواوكاری یەك بن، تا لە رەوشی تەندروستیی خەڵكی هەرێمی كوردستان دڵنیادەبنەوە.
هەروەها وەزیری خوێندن باڵا تەئكیددەكاتەوە، ئەولەویەتی كاری ئەوان رێگەگرتنە لە خراپبونی رەوشی تەندروستیی مامۆستایان و خوێندكاران و فەرمانبەران.