بڕیارە رۆژی چوارشەممە پەرلەمانی كوردستان لەسەر دیاردەی كۆچی گەنجان بۆ دەرەوەی وڵات و چەند پرۆژەیاسایەكی دیكە كۆببێتەوە.
لەوبارەیەوە رێواز فایەق سەرۆكی پەرلەمانی كوردستان بانگهێشتنامەیەكی ئاراستەی ئەندامانی پەرلەمان كردوە بۆ ئامادەبونیان لە دانیشتنی رۆژی چوارشەممە، كە كاتژمێر 11ی پێشنیوەڕۆ دەستپێدەكات.
بەپێی بانگهێشتنامەكە، لە كارنامەی دانیشتنەكەدا خوێندنەوە و گفتوگۆ لەسەر راپۆرتی پەیوەندییەكان و رەوەندی كوردستانی سەبارەت بە دیاردەی كۆچی گەنجان بۆ دەرەوەی وڵات دەكرێت، كە وەزیری رۆشنبیری و لاوانی حكومەتی هەرێمیش ئامادەی دەبێت.
هەروەها راپۆرتی لیژنەی بەدواداچون تایبەت بەو بابەتە دەخرێتەڕو، خوێندنەوەی دووەمیش بۆ پرۆژەیاسای فرۆشتن و بەكرێدانی مایەكانی دەوڵەت لە هەرێمی كوردستان دەكرێت.
