مستەفا كازمی سەرۆك وەزیرانی عیراق رایگەیاند ، لە چەند رۆژی داهاتوودا نیوەی هێزەكانی ئەمریكا دەكشێنەوە، وتیشی عیراق نابێتە گۆڕەپانێك بۆ ململانێی نێودەوڵەتی و ناوچەیی.
مستەفا كازمی بەبۆنەی 100هەمین ساڵیادی دامەزراندنی سوپای عێراق وتەیەكی پێشەكەشكرد و رایگەیاند ، بڕیاری كشانەوەی هێزەكانی ئەمریكا لە عێراق لە چوارچێوەی رێككەوتنی ستراتیجی نێوان عێراق و ئەمریكادایە و لەداهاتوشدا تەنها ژمارەیەكی كەم لەو هێزانە دەمێننەوە بۆ ڕاهێنان بە هێزەكانی عێراق و پێشكەشكردنی پاڵپشتی لۆجستی.
هێمای بۆ ئەوەشكرد”بەڕاستی جێی داخە عێراق بكرێتە گۆڕەپانی ململانێی یەكلایبونەوەی بەرژەوەندییەكانی وڵاتانی جیهان، عێراق وڵاتێكە خاوەنی شارستانیەكی گەورەی مێژوییە ، ئەركی سەر شانمانە كە وڵاتەكەمان بپارێزین لەو ململانێ مەترسیدارە، بۆیە داوا لە هەمو لایەنەكان دەكەم پابەندبن بە بەرژەوەندی نیشتمانیی و پشت بە زمانی دیالۆگ ببەستن”.
مستەفا كازمی رونیشیكردەوە، “بە گەلی عێراق مەزنی خۆمان دەڵێین قوربانیدانە گەورەكەی ئێوە بوە هۆی بنیادنانی ئاییندەیەكی شایستە بۆ عێراق و عێراقییەكان، 2021ـیش ساڵی دەستكەوتەكان دەبێت بۆ عێراق لە هەمو ئاستەكاندا”.
ئەمڕۆ چوارشەممە 6ی كانونی دووەمی 2021 یادی دامەزراندنی سوپای عیراقە كە لە هەمان بەرواردا لە ساڵی 1921 دامەزراوە.
