بەڕێوەبەری بەرهەمهێنانی كارەبا لە وەزارەتی كارەبای حكومەتی هەرێمی كوردستان ڕایدەگەیەنێت، لە ساڵی ڕابردوودا لە دوو ڕێگەوە توانیویانە هەزار مێگاوات كارەبا زیاد بكەن و ئێستا بەكاری دەهێنن و پلانیان هەیە بەرهەمەكە زیاتریش بكەن.
دیار تاهیر بابان بەڕێوەبەری بەرهەمهێنانی كارەبا لە وەزارەتی كارەبای حكومەتی هەرێمی كوردستان، ڕایگەیاند:”لە ساڵی ڕابردوو وەزارەتی كارەبای حكومەتی هەرێمی كوردستان هەزار مێگاوات كارەبای زیاد كردووە، 300 مێگاوات لەوانە لە وێستگەی خەبات چووەتە ناو تۆڕی كارەبا و گازی سرووشتی كە دەهات بۆ وێستگەكان 380 ملیۆن پێ سێجا و ئاستەكەی بەرز كراوە بۆ440 ملیۆن پێ سێجا، ئەمەش وای كرد چەند یەكەیەك كە وەستابوون بیانخەینەوە كار، بە كۆی یەكەكان و وێستگەی خەبات نزیكەی هەزار مێگاوات بۆ ناو تۆڕ زیادی كردووە”.
دیار تاهیر بابان ئاماژەی بەوەشدا: “ئەو دوو هەنگاوە وایان كرد كە بتوانین وەك وەزارەتی كارەبای حكومەتی هەرێمی كوردستان بەرهەمی كارەبا هەزار مێگاوات زیاد بكەین و بیخەینە خزمەت خەڵكی خۆمان و بەردەوام لە هەوڵداین بۆ ئەوەی بەرهەمی تریش زیاد بكەین”.
بەڕێوەبەری بەرهەمهێنانی كارەبا لە وەزارەتی كارەبا وتیشی:”ئێستا كۆی بەرهەمی كارەبای هەرێمی كوردستان دەگاتە نزیكەی 3 هەزار و500 مێگاوات”.
