هاوڵاتییەكی كوردی رۆژهەڵاتی كوردستان كە تۆمەتی كوشتنی منداڵ و هاوسەرەكەی و دایكی هاوسەرەكەی لەسەربوو، بەهۆی لێدان و ئەشكەنجەی هێزە ئەمنیەكانی كرماشانەوە گیانی لەدەستدا.
رێكخراوی هەنگاوی تایبەت بە مافەكانی مرۆڤ بڵاویكردوەتەوە: هاووڵاتییەكی پارێزگای كرماشان بەناوی “بەهمەن عوقابی” كە تەمەنی 35 ساڵە دوای ئەوەی لەلایەن هێزە ئەمنیەكانی ئەو پارێزگایەوە ئەشكەنجە دەدرێت دەبرێتە نەخۆشخانەی خومەینی، بەڵام بەهۆی خراپی بارودۆخی تەندروستی بێهۆش بوە و دواتر لە نەخۆشخانەكە گیانی لەدەستداوە.
رێكخراوەكە هێمای بۆ ئەوەشكردوە، هێزە ئەمنیەكان بە بنەماڵەكەیان وتوە بەهۆی خواردنی حەبی ترامادۆڵەوە بێهۆش بوە، بەڵام بنەماڵەكەی ئەوە رەتدەكەنەوە و جەختیانلەوەكردوەتەوە كوڕەكەیان تەنانەت جگەرەشی نەكێشاوە.
بەهمەن عوقابی كە تۆمەتی كوشتنی هاوسەرەكەی و منداڵەكەی و دایكی هاوسەری پێشوی لەسەر بوە لە 14ی تشرینی دوەمی 2019 هەڵات، بەڵام لە 31ی كانونی یەكەمی 2020 لە شاری تاران دەستگیركرا.
