مەسرور بارزانی سەرۆكی حكومەتی هەرێمی كوردستان دەڵێت: كێشەی ئێمە لەگەڵ بەغدا تەنها بودجە نییە و داكۆكی لەسەر رێكەوتنی پێشوو لەگەڵ حكومەتی عێراق دەكەین.
مەسرور بارزانی لە كۆنگرەیەكی رۆژنامەوانیدا وتی: لە رێگەی رێكخستنەوەی باج داهاتمان زیاد كردوە و پێداچونەوە بە گرێبەستی ئەو كۆمپانیانەدا دەكەین كە لە خاڵە سنوریەكان كاردەكەن، تائێستاش 100 كۆمپانیامان داوەتە دادگا، لەگەڵ ئەوەشداین لێخۆشبونی باج نەمێنێت، هەروەها پێویستە هەلی كار لە كەرتی تایبەت فراوان بكرێت.
لەبەشێكی تری قسەكانیدا سەبارەت بە كێشەكانی نێوان هەرێم و بەغدا وتی: هەڵبژاردنی پێشوەختە كاریگەری لەسەر گفتوگۆكانی نێوان هەرێم و بەغدا هەبوە، كێشەی ئێمە لەگەڵ بەغدا تەنها بودجە نییە و داوای رادەستكردنی تەواوی داهاتەكانی هەرێم نادەستورییە.
سەرۆكی حكومەتی هەرێم هێمای بۆ ئەوەشكرد: داكۆكی لەسەر رێكەوتنی پێشو لەگەڵ حكومەتی عێراق دەكەین و خواستی چارەسەركردنی سەرجەم كێشەكانمان لەگەڵ حكومەتی عێراق هەیە و داوامان كردوە بودجە شەفاف بێت و لەسەر بنەمای دەستور بێت، ئەركی هەموو لایەنەكانیشە داكۆكی لە مافەكانی گەلی كوردستان بكەن.
