قوباد تاڵەبانی جێگری سەرۆكی حكومەتی هەرێم جەختلەوەدەكاتەوە: هەمولایەك دڵنیا دەكەنەوە دەستبەجێ پابەند دەبن بە بودجەوە و هیواش دەخوازێت پەسەندكردنی بوجە ببێتە هۆی باشكردنی دۆخی دارایی.
قوباد تاڵەبانی لە پەیامێكی ڤیدیۆییدا ئاماژەی بەوەدا: بودجە پەسەند كرا و هیوادارن ببێتە هۆی گەڕانەوەی سەقامگیری ئابوری و باشتركردنی دۆخی دارایی عێراق و هەرێم ، ئەم بودجەیە دەرئەنجامی گفتوگۆ و كۆبونەوەیەكی دور و درێژ بوو.
لە بەشێكی تری پەیامەكەیدا وتی: ئەم دەستكەوتە دەستكەوتی هەمو ئەوانەیە كە بەشداربون تێیدا، لە سەرۆك كۆمارەوە تا ئەندامانی ئەنجومەنی وەزیرانی ناوەند و سەرۆكایەتی ئەنجومەنی وەزیران و كوتلە كوردستانیەكان و هاوپەیمانی هیوا و فراكسیۆنی پارتی و یەكێتی و ئەندامانی لیژنەی دارایی، هەروەها سەرۆكانی هەرێم و حكومەتی و سەرجەم سەركردە سیاسیەكان بەردەوام لەسەر خەت بون.
جێگری سەرۆكی حكومەتی هەرێم پێشی وایە: ئەم دەرئەنجامە كۆتایی رێگاكەیان نییە بەڵكو دەستپێكی رێگایەكی نوێیە و هیوادارن ببێتە باشتركردنی پەیوەندییەكانی نێوان هەرێم و بەغداد و هەڵدانەوەی پەڕەیەكی نوێ، ئێمە هەمو لایەكیش دڵنیا دەكەنەوە دەستبەجێ پابەند دەبین بە بودجەكەوە و وەزارەتەكان ئاگادار دەكەنەوە كە پەیوەندی بە ناوەندەوە بكەن و ئامادەیی جێبەجێكردنی بودجە دەربڕن.
