حەسەن تەمیمی وەزیری تەندروستی و ژینگەی عێراق پێی وایە: بەرزبونەوەی بەردەوامی ژمارەی توشبوانی پەتای كۆرۆنا لەوانەیە ببێتە هۆی دەركەوتنی نەوەی نوێی ڤایرۆسەكە و دروستبونی كێشەی گەورە لە سیستمی تەندروستی.
حەسەن تەمیمی لە لێدوانێكی رۆژنامەوانیدا باسی لەوەكردوە: بەرزبونەوەی ژمارەی توشبوانی كۆرۆنا و گەیشتنە 8 هەزار توشبوی رۆژانە، هۆكارەكەی ئەوەیە هاوڵاتیان رێوشوێنە خۆپارێزییەكان لەبەرچاو ناگرن.
رونیشیكردوەتەوە: لەوانەیە بەرزبونەوەی ژمارەكە ببێتە هۆی دەركەوتنی نەوەی نوێی ڤایرۆسەكە، ئەوەش دەبێتە هۆی دروستبونی كێشەی گەورە لە سیستمی تەندروستی.
وەزیری تەندروستی عێراق جەختیلەوەشكردوەتەوە: بەڕێوەبەرایەتیە تەندروستیەكان ژێرخان و توانایان هەیە، بەڵام ئەوەی لێی دەترسین و هۆشداری لێ دەدەن ئەوەیە، ژمارەی توشبوان لە توانای سیستمی تەندروستی زیاتر ببن.
