بریكاری وەزارەتی شەھیدان و ئەنفالكراوانی حكوومەتی ھەرێمی كوردستان ڕایگەیاند، لیژنەیەكی تایبەتمەند بۆ گواستنەوەی مووچەی تەواوی شەهیدان لە وەزارەتەكانی تری حكوومەتی هەرێم بۆ سەر وەزارەتی شەهیدان و ئەنفالكراوان پێكهاتووە و، ڕەزامەندیی ئەنجوومەنی وەزیرانیش بۆ رێكارەكانی دەرچووە.
بەرەڤان حەمدی، بریكاری وەزارەتی شەھیدان و ئەنفالكراوانی حكوومەتی ھەرێمی كوردستان به ماڵپه‌ڕی فه‌رمی پارتی وتووه “بەپێی یاسای ژمارە 2ی ساڵی 2020 و رێكاری ژمارە 4ی 2020ی چاكسازی لە هەرێمی كوردستاندا، كە بڕیاری ئەنجوومەنی وەزیرانیشی بۆ دەرچووە، پێویستە سەرجەم دۆسیەی شەهیدان لە تەواوی وەزارەتەكانی دیكە ئاڕاستەی وەزارەتی كاروباری شەهیدان بكرێت، بۆ ئەم مەبەستەش رێكارێكی تایبەت لە نێوان وەزارەتی كاروباری شەهیدان و وەزارەتی پێشمەرگە و ناوخۆ دانراوە و لیژنەش پێكهێنراوە، كە بەشی زۆری دۆسیەكان لەم سێ وەزارەتەن و لەگەڵ وەزارەتی داراییش هەماهەنگی دەكرێت”.
باسی له‌وه‌شكردووه: “لیژنەكە دەستبە كاربووە و هیچ رێگرییەكی یاسایی نەماوە بۆ كاری لیژنەكە ، كە رێكارەكە ڕەزامەندی ئەنجوومەنی وەزیرانی بۆ دەرچووە و لەم هەفتەیەدا لە وەقایعی كوردستان بڵاو دەكرێتەوە، كە پاش بڵاوبوونەوەشی، ئەم پرۆسەیە لە رێگای لیژنەی تایبەتمەندی نێوان وەزارەتەكانەوە دەچێتە بواری جێبەجێكردنەوە، بەوەی كە دۆسیەكانیان بەو مووچەیەی كە ئێستا وەریدەگرن لە وەزارەتە تایبەتمەندەكانی خۆیانەوە دەگوازرێنەوە سەر وەزارەتی كاروباری شەهیدان”.
رونیشیكرده‌وه: “بۆ ئەم قۆناغە بەپێی ئەو سیستمە مووچەیان دەبێت كە هەیانە، بۆ ماف و ئیمتیازاتەكانیشیان بەپێی یاسای ژمارە (9) ماف و ئیمتیازاتەكانیان پێ دەدرێت كە لە حكوومەتی هەرێمی كوردستان پێیان دەدرێت”.
بریكاری وەزارەتی شەھیدان و ئەنفالكراوان راشیگه‌یاندووه، “سەبارەت بە شەهیدانی شەڕی داعشیش، لە ماوەی ساڵانی رابردوودا تەنها مووچەكانیان لەبەر جیاوازیی مووچە لە وەزارەتی پێشمەرگە مابوو، ئەگەرنا وەكو ماف و ئیمتیازات و خوێندن و دابەشكردنی زەوی لەلایەن وەزارەتی شەهیدانەوە چاودێری دەكرا و پشتگیرییان پێ دەدرا، بۆ ئەوەی لە دامودەزگا فەرمییەكان هاوكاری و كارئاسانییان بۆ بكرێ”.
لەبارەی هۆكاری گواستنەوەی دۆسیەی شەهیدانەوە، بەرەڤان حەمدی وتی: “مەبەست لەم گواستنەوەیە، یەكخستن و رێكخستنی لیستەكان و دۆسیەكانی شەهیدانە لە وەزارەتی شەهیدان، هەروەها ئەو ماف و ئیمتیازاتانەی لە وەزارەتی شەهیدان هەیە، بە كەسوكارەكانیان بدرێت”.
