موقدەم ئازاد تەها وتەبێژی بەڕێوەبەرایەتی پۆلیسی هاتووچۆی دهۆك ئاشكرایكرد: لە 4 مانگی رابردودا لە پارێزگاكە 252 روداوی هاتوچۆ رویانداوە و تێیاندا 29 كەس گیانیان لەدەستداوە و 282ی تریش بریندار بون.
موقدەم ئازاد تەها لە كۆنگرەیەكی رۆژنامەڤانیدا وتی: لە رۆژانی جەژندا سەرجەم كارمەندانی هاتوچۆ لە ئەركدا دەبن و لە هەموو ترافیك لایتەكانیش پۆلیسی هاتوچۆیان لێدەبێت، هەروەها هاوئاهەنگیان لەگەڵ هەموو دامودەزگە ئەمنیەكانی پارێزگای دهۆك كردوە، وەكو پۆلیس و پێشمەرگە و زێرەڤانی و دادگەی باڵای پارێزگای دهۆك.
باسی لەوەشكرد: رۆژانی جەژندا هەر ئۆتۆمبێلێك دەستی بەسەردا بگیرێت تاوەكو دوای جەژن رادەستی خاوەنەكەی ناكرێتەوە، بەهۆی ئەوەشی ژوری ئۆپەراسیۆنی پارێزگاكە قەدەغەی هاتوچۆی لە رۆژانی جەژن رانەگەیاندوە، پێویستە شۆفێران پابەندی رێنوێنییەكانی هاتوچۆ و تەندروستی ببن.
سەبارەت بە ئامارەكان باسی لەوەكرد: لە سەرەتای ئەمساڵەوە تاوەكو كۆتایی مانگی نیسان 252 روداوی هاتوچۆ رویانداوە و تێیاندا 29 كەس گیانیان لەدەستداوە و 282 كەسیش بە سەختی برینداربون، بەڵام لە مانگی رەمەزاندا 47 روداوو هەبون و 71 كەس بریندار بون و 8 كەسیش گیانیان لەدەستداوە.
