وەزارەتی كارەبای حكومەتی هەرێمی كوردستان، ئەو هاوبەشانەی ئاگادار دەكاتەوە كە پێوەری زیرەكیان بەستووە و دەڵێت، بەپێی خشتەیەك كارەبایان پێدەدرێت.
بەپێی ئاگارییەك كە لەلایەن وەزارەتی كارەباوە بڵاوكرایەوە” ئاگاداریی هاوبەشانی كارەبا دەكەینەوە ئەوانەی پێوەری زیرەكیان بۆ دانراوە لەم قۆناغەدا وەزارەتی كارەبا هەڵدەستێت بەدیاریكردنی بڕی پێدانی كارەبا بەمشێوەیە : جۆری هاوبەشی پێوەری سینگل فەیس بە 40 ئەمپێڕ و سری فەیس بە 90 ئەمپێڕ، بەمشێوەیە هەموو ئەو هاوڵاتیانەی پێوەری زیرەكیان بۆ بەستراوە ئەگەر وزەی كارەبای بەكارهاتوو لەو ئاستەی وەزارەت دیاریكردووە زیاتر بەكارهێنرا ئەوا وەكو ئاگاداركردنەوەیەك وزەی كارەبای ئەو هاوبەشە بۆ ماوەی 45 چركە دەكوژێتەوەو پاش ( 150 ) چركە كارەباكەی بۆ دەگەڕێتەوە، ئەگەر لەماوەی 30 خولەكدا پێنج جار بڕینی كارەبا لەسەر یەك روویدا، ئەمجارە كارەبای هاوبەشەكە دەبڕدرێت و پاش 45 خولەك كارەباكەی دەگەڕێتەوە”.
هەر لە ئاگادارنامەكەدا هاتووە، “پەیڕەوكردنی ئەم شێوازە بۆ پێدانی كارەبا بە یەكێك لەمواسەفاتەكانی پێوەری زیرەك دادەنرێت، بۆ ئەوەی لەوەرزەكانی ساڵ دا بەپێی هەڵكشانی خواست و بەرهەمهێنانی كارەبا وەزارەت بتوانێت كۆنترۆڵی كارەبا بكات و بەشێوەیەكی دادپەروەرانە زۆرترین ماوە كارەبا بدات بە هاوڵاتیان، لەگەڵ باشكردنی بارودۆخی كارەبا و جێگیركردن و كۆنترۆڵكردنی سیستەمی كارەبا گۆڕانكاریی بەسەر پەیڕەوكردنی شێوازی دیاركردنی بڕەكەدا دێت”.
