wazho.net
په‌رله‌مانی كوردستان نیگه‌رانی خۆی له هێرشه‌كه‌ی سه‌ر هێزه‌كانی پێشمه‌رگه له‌لایه‌ن په‌كه‌كه‌وه له سنوری قه‌زای ئامێدی ده‌بڕی و داوای له په‌كه‌كه و توركیا كرد، شه‌ڕی خۆیان له سنووری هه‌رێمی كوردستان دور بخه‌نه‌وه.
له راگه‌یه‌نراوه‌كه‌ی په‌رله‌مانی كوردستاندا هاتووه، بە ناوی پەرلەمانی کوردستانەوە هاوخەمی خۆمان بۆ شەهیدبوونی ئەو پێنچ پێشمەرگە قاره‌مانه دەردەبڕین، کە بەرەبەیانی رۆژی 5ی 6ی 2021 لە دەڤەری ئامێدی، وەك ئەوەی لە راگەیەنراوی وەزارەتی پێشمەرگەدا هاتووە لەلایەن پەکەکەوە لە بۆسەیەکدا شەهید کران. وێڕای پرسە و سەرەخۆشیمان بۆ خانەوادە و کەسوکاری سەربەرزیان، هیوای زوو چاکبوونەوە بۆ پێشمەرگە بریندارەکان دەخوازین.
هه‌روه‌ها له راگه‌یه‌نراوه‌كه‌دا هاتووه، پەرلەمانی كوردستان بژاردەی شەڕ بە هەموو جۆرێك رەتدەکاتەوە و خوازیارین شەڕی لایەنە ناکۆکەکان لە سنوورەکانی هەرێمی کوردستان دووربخرێتەوە.
جه‌ختیشكراوه‌ته‌وه، دەبێت هەموو لایەك سەروەری هەرێمی کوردستان بپارێزن و بیانو بە دەستەوە نەدرێت بۆ شەڕ و پەلامار و لەشکرکێشی وڵاتان، بەجۆرێك کە کار بکاتە سەر ناوچەکانی کوردستان و بە هۆیەوە سەر و ماڵی هاووڵاتیانمان و سروشتی ناوچەکە بکەوێتە مەترسییەوە و رێگری بکرێت لە ئاوەدانکردنەوە و ئارامی گوندەکان.
له كۆتایی راگه‌یه‌نراوه‌كه‌دا هاتووه، داواکارین لە پەکەکە و تورکیا شەڕ و ئالۆزیەکانی خۆیان لە هەرێمی کوردستان دووربخەنەوە و بژاردەی ئاشتی و چارەسەری سیاسی بگرنە بەر و رێز لە دامودەزگاکانی هەرێمی کوردستان و سەروەری هەرێمی کوردستان و عێراق بگرن.
