سەرۆكی پەرلەمانی كوردستان رایگەیاند، پێویستە هەموو لایەنەكان كۆدەنگ بن لەسەر پەرەپێدانی ئازادی، دیموكراسی، بەهێزكردنی دامەزراوەكانی دادوەری و پاراستنی سەربەخۆییان لەبڕیاردان و دورخستنەوەی دەستی حزب لەبازاری ئازاد، راشیگەیاند: “تەحەدیاتی ناوخۆ كاریگەرترین هۆكارە لەسەر بنكۆڵكردنی قەوارەكەمان”.
رێواز فایەق، سەرۆكی پەرلەمانی كوردستان لەوتارێكدا لەپانێڵی “ئاڵنگاری و پێشهاتەكانی بەردەم هەرێمی كوردستان” ئاماژەی بەوەشكرد، قەوارەی كوردستان بەرهەمی خوێنی شەهیدانە و لەئێستادا چەندین ئاستەنگی و كێشەی ناوخۆیی رووبەڕوو بووەتەوە، لەم بوارەشدا هەموان بەرپرسیاریەتییان دەكەوێتە ئەستۆ.
راشیگەیاند، “دەبێت چارەسەری كێشەكانمان ئەولەویەت بێت و یەكڕیزی نێوان لایەنە سیاسییەكانیش بەپێویست دەزانین بەتایبەت كۆدەنگیان لەسەر پەرەپێدانی ئازادی، دیموكراسی، بەهێزكردنی دامەزراوەكانی دادوەری و پاراستنی سەربەخۆییان لەبڕیاردان، چونكە بەداخەوە لەئیستادا هەست دەكرێت مەترسییەكانی سەر قەوارەكەمان لەلایەن هاوڵاتیانەوە وەك پێویست جێگەی متمانە نەماوە و چیتر وەك خەمی گشتی نەماوە”.
