پارێزگاری سلێمانی رایگەیاند، رۆژانە وەزارەتی نەوتی عێراق یەك ملیۆن و 80 هەزار لیتر بەنزین بۆ هەرێم دەنێرێت و ئەوەش رێژەیەكی كەم لە پێداویستی هەرێم پڕدەكاتەوە، دەشڵێت، بەغدا بە 650 دینار بەنزین دەدات بە هەرێم، بەڵام بە 690 دینار دەدرێت بە هاوڵاتیان.
هەڤاڵ ئەبوبەكر پارێزگاری سلێمانی بە رۆژنامەی سەباحی عێراقی راگەیاند، یەكەم كاروانی بەنزین كە لەلایەن وەزارەتی نەوتی عێراقییەوە رەوانەی پارێزگاكەیان كراوە گەیشتووەتە دەستییان و لەگەڵ گەیشتنی بەنزینەكە بەسەر بەنزینخانەكاندا دابەشكراوە..
رونیشیكردەوە، “بەنزینەكە بەغدا بە 650 دینار هەر لیترێك دەدات هەرێم بە بەڵام 690 دینار دەدرێت بە هاوڵاتیانی هەرێم”، دەشڵێت، “ئەو 40 دینارەی دەچێتە سەری 20 دیناری بۆ كرێی گواستنەوەی بەنزینەكە و 20 دیناریش بۆ سوودی بەنزینخانەكانە.”
هەڤاڵ ئەبوبەكر باسی لەوەشكرد، “ناردنی ئەم كاروانی بەنزینە بەشێكی كەم لە پێداویستی هەرێم پڕدەكاتەوە”، چونكە هەرێم رۆژانە پێویستی بە شەش ملیۆن لیتر بەنزین هەیە، بەڵام بەغدا زیاتر لە ملیۆنێك لیتر دەنێرێت.
لەبارەی گرانبوونی نرخی بەنزینیشەوە پارێزگاری سلێمانی وتی، لە چەند مانگی رابردوودا نرخی بەنزین بەشێوەی پلە پلە بەرزبووەوە، هۆكارەكەشی گرانبوونی نرخی دۆلاربوو، چونكە حكومەتی هەرێم بەنزینی لە توركیا و ئێرانەوە هاوردەی دەكرد.
