ئەندامێكی لیژنەی كشتوكاڵ و سەرچاوەكانی ئاو و زۆنگاوەكان لە ئەنجومەنی نوێنەرانی عیراق هۆشداری دەدات لە كارەساتی ژینگەیی بەهۆی كەمبونەوەی ئاو و پشتگوێخستنی زۆنگاوەكان لەلایەن حكومەتەوە.
رەفیق ساڵحی ئەندامی لیژنەی كشتوكاڵ و سەرچاوەكانی ئاو و زۆنگاوەكان لە پەرلەمانی عیراق رایگەیاندوە، حكومەت پلانێكی بۆ پشتیوانیكردنی زۆنگاوەكان نییە سەرەڕای ئەوەی ناوچەكە لەناو كلتوری جیهانیدا ریزبەند كراوە، بەڵام ئەمڕۆ بەدەست پشتگوێخستنەوە دەناڵێنێت و سامانی ماسی تیایدا بەرەو لەناوچون دەچێت بەهۆی كەمبونەوەی ئاوەوە.
ساڵحی راشیگەیاندوە، لە حكومەتی سودانیمان نەبینیوە جدی بێت لە دانوستان لەگەڵ ئەنقەرە هیچ پلانێكیشی نییە بۆ پەرەپێدانی زۆنگاوەكان تاكو بكرێتە ناوەندێكی گەشتیاری پێشكەوتو، بۆیە داوا دەكەن پرۆژە لە زۆنگاوەكان دابمەزرێنن.
ئەو پەرلەمانتارەی عیراق دەشڵێت، سامانی ئاژەڵیی لە ناوچەكەدا بەرەو لەناوچون دەچێت ئەمەش هۆكارە بۆ سەرهەڵدانی كارەساتێكی مرۆیی و جێهێشتنی دانیشوانی زۆنگاوەكان.
