د. رەهێڵ فەرەیدون بریكاری وەزارەتی تەندروستیی حكومەتی هەرێم ئاشكرای كرد، بەهۆی بەرزبوونەوەی ژمارەی توشبووانی كۆرۆنا نەخۆشخانەكان پڕ بوون و بنكەی زیاتر بۆ چارەسەكردنی توشبووان دەكەنەوە.
د. رەهێڵ فەرەیدون رایگەیاندووە، لەماوەی دوو هەفتەی رابردوو ژمارەی توشبووانی كۆرۆنا گەیشتووەتە ئاستێكی مەترسیدار و نەخۆشخانەكان پڕ بوون و بە ناچاری نەخۆشخانەی دیكەی تایبەت كراون بە شوێنی چارەسەری توشبووانی كۆرۆنا.
ئاماژەی بەوەشداوە، هەموو ئامادەكارییەكمان كردووە بۆ زیادكردنی بنكەكانی چارەسەری كۆرۆنا و هەڵسەنگاندنی بارودۆخەكە و لە پارێزگاكان نەخۆشخانەی دیكە بۆ ئەو مەبەستە تەرخان كراون.
سەبارەت بە ڤاكسینەكان د.رەهێڵ باسی لەوەكردووە، پێویستە تا كۆتایی ساڵ 20٪ی هاوڵاتیان ڤاكسین وەربگرن، پێشتر گرفتمان كەمی ڤاكسین بوو چونكە ڤاكسینی پێویست بەردەست نەبوو، زۆریش هەوڵماندا بەڵام فایزەر ئامادە نەبوو پێمان بفرۆشێت هەروەها ئەسترازینیكاش نەكڕدرا ئەوەی سینۆفارمیش داخوازیی هاوڵاتیانی لەسەر نییە، سەرەڕای ئەوەش عێراق دەبێت رێژەی 17٪ی ڤاكسین بداتە هەرێم بەڵام بەداخەوە ئەو رێژەیە نانێرێت بەڵكو 12٪ دەنێرێت، بەڵام رۆژ بە رۆژ ڤاكسینی زۆرتر دێتە عێراق بەشی ئێمەش زیاد دەكات.
