بەرهەم ساڵح سەرۆك كۆماری عیراق دەڵێت، ناكرێت هەموو ساڵێك هەرێمی كوردستان و حكومەتی فیدراڵ دانوستان لەسەر بودجە بكەن و پێویستە كێشەكان لە رێگەی یاسا و دەستورەوە یەكلایی بكرێتەوە
بەرهەم ساڵح لە وتەیەكدا لە كۆڕبەندی ئاشتی و ئاسایشی رۆژهەڵاتی ناوەڕاست لە شاری دهۆك وتی، كێشەكانی نێوان هەرێمی كوردستان و عیراق ساڵانە دوبارە دەبنەوە، كێشەی كەڵەكەبوو لە نێوان بەغدا و هەولێر هەیە و پێویستیان بە چارەسەری بنەڕەتی هەیە.
رونیشیكردەوە، نابێت هەموو ساڵێك هەردولا دانوستان لەسەر بودجە بكەن و دەبێت كێشەكان لە رێگەی یاسایی و دەستورییەوە یەكلایی بكرێنەوە و پێویستە هەڵوەستە لەسەر كێشەكانی نێوان هەردولا بكەین، جەختی لەوەش كردەوە كە پێگەی هەرێمی كوردستان لەسەر ئاستی عیراق و ناوچەكە دیارە.
سەرۆك كۆماری عیراق وتیشی، پێكهاتەكان كار بۆ داهاتوویەكی باشتر دەكەن، رژێمی پێشوو هەموو رێگەیەكی بۆ سەركوت كردنی پێكهاتەكان گرتەبەر، قەیرانی حكومڕانی لە عیراقدا هەیە و كێشەكانی تەنها پێكهێنانی حكومەتی نوێ نییە، هیوادارن هەموو لایەنەكان ئەنجامی هەڵبژاردن قبوڵ بكەن و لە دوای هەڵبژاردن، عیراق بەرەو ئاشتی بچێت.
هەرچی سەبارەت بە رۆژهەڵاتی ناوەڕاست و ناوچەكەیە بەرهەم ساڵح وتی، رۆژهەڵاتی ناوەڕاست بەردەوام لەناو گۆڕانكاریدایە و گۆڕانكارییەكان پەیوەستن بە عیراقەوە، سەقامگیری ناوخۆیی كاریگەری لەسەر ناوچەكە هەیە و عیراق دەبێتە رێڕەوێك بۆ بەستنەوەی كەنداو بە ئەوروپا، بۆیە پێویستە ئاشتەوایی دەستەبەر بكرێت.
