سەعید هەركی جێگری سەرۆكی لیژنەی دەستپاكی لە پەرلەمانی كوردستان دەڵێت، راپۆرتی سێیەمی چاكسازی كە ئاڕاستەی پەرلەمان دەكرێت جیاواز دەبێت و كۆمەڵێك خاڵی گرنگ لەخۆ دەگرێت، پرۆژەی چاكسازی نەخشە رێگا دەبێت و تەنانەت دوایی كۆتایی هاتنی ئەم كابینەی حكومەت كاری پێدەكرێت.
سەعید هەركی بە ماڵپەڕی فەرمی پارتی وتووە، بەپێی یاسای چاكسازی، حكومەتی هەرێم هەر سێ مانگ جارێك راپۆرتی خۆی رەوانەی پەرلەمان دەكات، تاوەكو ئێستاش دوو راپۆرتی رەوانە كردووە، ئێستاش كار بۆ ناردنی راپۆرتی سێیەمی دەكرێت كە چەندین خاڵی گرنگ و جیاوازی تێدایە.
رونیشیكردووەتەوە، جیاوازی راپۆرتی سێیەمی چاكسازی زیاتر لایەنی ئیجرائی و جێبەجێكردنە و تەواوی ئەو سێكتەر و بوارانە لەخۆ دەگرێت كە لە چوارچێوەی پرۆژەكەدا ئاماژەیان پێ كراوە و دەبێت چاكسازییان تێدا بكرێت.
هەركی جێگری سەرۆكی لیژنەی دەستپاكی هێمای بۆ ئەوەش كردووە، وەك پەرلەمان و لیژنەی دەستپاكی لە سەرەتاوە تاوەكو كۆتایی چاودێری جددی بوون بۆ جێبەجێكردنی هەنگاوەكانی چاكسازی، ئەوەی لە پرۆژەكەدا هەیە قۆناغ بە قۆناغ جێبەجێ دەكرێت تەنانەت ئەگەر ئەم كابینەش كۆتایی بێت، دەبێتە نەخشەڕێگا بۆ داهاتوو.
