فازڵ نەبی بریكاری پێشووی وەزارەتی دارایی و ئابوریی عیراق دەڵێت، ئەمە كۆتا مانگی ناردنی 200 ملیار دینارەكە بوو لە بەغدا، بۆیە پێویستە حكومەتی هەرێم ئەگەر خەمی خۆشی ناخوات خەمی خەڵك بخوات.
فازڵ نەبی بە دەنگی ئەمریكای وتووە، ئەمە كۆتا مانگی ناردنی 200 ملیارەكە بوو و ئێستا بەغدا ناردنی راگرتووە، حەزناكات خەڵك بێ ئومێد بكات بۆیە پێویست بەوە دەكات حكومەتی هەرێم ئەگەر خەمی خۆشی نەخوات خەمی ئەو خەڵكە رەش و رووتە بخوات و جوڵەیەكی جددی لەسەر ئەو بابەتە بكات.
باسی لەوەش كردووە، بەڵام نابێت وەفدی جارەكانی تر بچنەوە بەغدا چونكە ئەگەر هەمان وەفدی پێشوو بچنەوە ئەوە روودەدات كە ئێستا روویداوە كە 200 ملیارەكە راوەستاوە و هیچ پارەیەك نایەت، بۆ ئەوەی خەڵكیش لێی تێك نەچێت و حكومەتیش ئەو راستیە بزانێت ئەو 200 ملیارە بۆ ئەوە بوو هەتا ئەوكاتەی دەگەنە ئەنجامێك ئینجا دواتر تەسویەی سولفەكان دەكەن، بەڵام بەداخەوە نەگەیشتنە ئەنجام.
سەبارەت بە راگرتنی ئەو پارەیە وتویەتی، بەغدا بۆ نەناردنی دوو بیانویان گرتووە، یەكێكیان دەڵێت كە لەبەرئەوەی ئێمە نەگەیشتینە ئەنجام ناتوانین لەوە زیاتر پێشینە بدەین، دووەمیان دەڵێن سەرقاڵی تەسویەكردنی حساباتی خۆمایانن و حسابات دەداخەن، ئەوەی دووەمیان وانیەو 10 ساڵ بریكاری وەزارەتی دارایی بووم لە بەغدا، لە 25ی 12حسباتمان دادەخست، واتە هێشتا چەند رۆژێك ماوە بۆ داخستنی.
