بەڕێوەبەری كۆمپانیای بەبازاڕكردنی نەوتی عیراق (سۆمۆ) رایگەیاندوە، بەرزبونەوەی نرخی نەوت لەجیهاندا پەیوەندی هەیە بەو كارتێكەرە جیۆسیاسی و گرژییانەی لەناوچەكەدا هەیە، هەروەها هۆكارێكی تریش پەیوەندی بە بەرهەمهێنانەوە هەیە لە هەندێك وڵاتی هەناردەكارەوە، لەگەڵیشدا حاڵەتەكانی گۆڕانكاری لە كەشوهەوادا كاریگەیی دەكاتە سەر بەرزبونەوەو نزمبونەوەی نرخەكەی.
خزر ئەلیاسری بەڕێوەری گشتی كۆمپانیای سۆمۆ لەبارەی پابەندییەكانی هەرێمی كوردستان بەرامبەر بەغدا بە ئاژانسی هەواڵی عیراقی راگەیاندوە، لەسەر رۆشنایی مادەی 11ی بودجەی گشتی عیراق بۆ ساڵی 2021، كۆمپانیای سۆمۆ بڕی هەناردەكردنی نەوتی بۆ هەرێمی كوردستان دیاریكردوە كە بڕەكەی 250 هەزار بەرمیل نەوتە لە رۆژێكداو گەڕاندنەوەی داهاتەكەیەكی بۆ وەزارەتی دارایی حكومەتی فیدراڵ، لەگەڵیشیدا گەڕاندنەوەی زانیارییەكانی تایبەت بەهەناردەكردنەكەیەتی.
ئەلیاسری رونیشیكردۆتەوە: دوای هەژماری بڕی هەناردە كراو بەپێی ئەو نرخە فەرمییەی كە راگەیەنراوە لەلایەن كۆمپانیای بەبازاڕكردنەوە داهاتەكەی دەگەڕێتەوە بۆ حكومەتی ناوەندی، بەڵام ئەوەی تاچەند حكومەتی هەرێم پابەند بوە بە رێككەوتنەكەوە، پەیوەندی بەوەزارەتی داراییەوە هەیە، لەپسپۆڕی و ئەركی كۆمپانیاكە نییە.
