پەرلەمانی كوردستان بەدواداچون بۆ داهاتی ناوخۆی هەرێمی كوردستان دەكات و نیگەرانیشن لە دواكەوتنی پێشكەشكردنی راپۆرتی چاكسازی لەلایەن حكومەتەوە بۆ پەرلەمانی كوردستان.
بەپێی راگەیەنراوێكی پەرلەمانی كوردستان، بۆ بەدواداچون لە داهاتی ناوخۆی هەرێم لیژنەی دارایی و كاروباری ئابوری پەلەمان بەسەرپەرشتی زیاد جەبار سەرۆكی لیژنەو ئەندامانی كۆبۆوە، لەبەشێكیدا گفتوگۆیان كردوە لەبارەی داهاتی ناوخۆی هەرێم و بۆ ئاگادار بون و بەرچاوڕونی زیاتر بڕیاریانداوە سێ نوسراو ئاڕاستەی ئەنجومەنی وەزیران بكەن بۆ كۆبونەوە لەگەڵ هەریەك لە ئەنجومەنی باڵای ئابوری، بەڕێوەبەرایەتی گشتیی گومرگی سلێمانی و هەولێرو بەڕێوەبەرانی دەروازەكان و بەڕێوەبەری گشتی بانكە بازرگانییەكان، بەمەبەستی تاوتوێكردن و لەنزیكەوە ئاگاداربون لە داهاتی ناوخۆی هەرێمی كوردستان.
ئاماژە بەوەشكراوە كە لە تەوەرێكی تری كۆبونەوەكەدا، یاسای چاكسازی گفتوگۆی لەبارەوە كراوەو ئەندامانی لیژنەكە نیگەرانی خۆیان لە نەناردن و دواكەوتنی راپۆرتی چاكسازی دەربڕیوە كە بڕیاربوە هەموو سێ مانگ جارێك بۆ لیژنەكە بنێردرێت، بۆیە بڕیاردراوە نوسراوێك ئاڕاستەی ئەنجومەنی وەزیران بكرێت و تیایدا داوای ناردنی راپۆرتی قۆناغەكانی جێبەجێكردنی مادەكانی یاسای چاكسازی بكرێت.
