هاتووچۆی سلێمانی ئاشكرای كرد، لەو ناوچە گەشتیاری و سەیرانگایانەی هاوڵاتیان بۆ نەورۆز رووی تێدەكەن ئەركەكانیان دابەشكردوە بۆ نەهێشتنی دیاردەی سەركێشی و دیاردەی خێرایی كە هۆكاری روداوە نەخوازراوەكانە.
بەڕێوەبەرایەتی هاتووچۆی سلێمانی لە راگەیەنراوێكیدا بڵاویكردووەتەوە، بۆ سەرجەم ئەو ناوچانەی كە گەشتیار و هاوڵاتییان بەگشتی رووی تێدەكەن، بە پلانێكی تۆكمە و گونجاو و دیراسەكراو ئەركەكانیان دابەشكردووە.
ئەوەش هاتووە، بۆ نەهێشتنی دیاردەی سەركێشی و دیاردەی خێرایی كە هۆكاری روداوە نەخوازراوەكانە، سەرجەم كامێراكانی چاودێری خێرایی لەناو شار و رێگاوبانەكانی دەرەوە و ناوچە گەشتیارییەكانیان دەستنیشانكردوە، لەگەڵ لابردنی ئەو لەمپەڕە پلاستیكییانەی بەردەم بازگە و خاڵەكانی پشكنینن “بەشێوەیەكی كاتی” بەمەبەستی نەهێشتنی دیاردەی قەتیس بوون.
هاتووچۆی سلێمانی جەختی لەوەش كردووەتەوە، ئەوەش وێڕای كاراكردنی تیمی فڕۆكەوانی هاتووچۆی سلێمانی بۆ چاودێریكردنی دۆخی هاتووچۆ و پێدانی زانیاری دۆخی قەرەباڵغی رێگاوبانەكان بە كۆنترۆڵی هاتووچۆ، هەروەها بەرچاوڕوونی تەواو دراوە بە ئەفسەران و كارمەندانی هاتووچۆ بۆ هاوكاری تەواوی هاوڵاتییان بەگشتی و بە شۆفێران بە تایبەتی.
