لیزا فەلەكەدین كاكەیی پەرلەمانتاری فراكسیۆنی پارتی لە پەرلەمانی كوردستان دەڵێت، لەوانەیە لەم هەفتەیەدا گۆڕانكاری رووبدات و ئەگەر رووشنەدات، ئەگەر هەیە پارتی زۆرینەی پەرلەمانی بەكاربهێنێت.
لیزا فەلەكەدین كاكەیی بە پێگەی فەرمی حزبەكەی وتووە، وەك فراكسیۆنی پارتی دوای هۆشدارییەكەی داویانە بە سەرۆكی پەرلەمان و تاوەكو ئێستا رەوشەكە هەروەك خۆیەتی، داواكارن دەست بە كۆبوونەوەی پەرلەمان بكرێت.
رونیشیكردووەتەوە، پێشبینی دەكرێت لەم هەفتەیەدا هەندێك گۆڕانكاری رووبدات و رەوشەكە لەو چەقبەستووییەی هەیە دەربازی ببێت، دیار نییە گۆڕانكارییەكان تاوەكو چ رادەیەك دەبن، بەڵام ئەو رەوشەی ئێستا بەم شێوەیە نامێنێت، هەمووان تەمەننای ئەوە دەكەن هەرێم لەم قۆناغە تێپەڕێت و لایەنەكان بگەنە ئەنجامێك.
لەبارەی ئەوەی دەوترێت ئەگەر پەرلەمان پەك بخرێت پارتی نیەتی بەكارهێنانی زۆرینەی پەرلەمانی هەیە ئەو پەرلەمانتارە وتویەتی، پارتی نیەتی زۆرینەی نییە بەڵام ئەگەر رەوشەكە بەو شێوەیەی ئێستا بەردەوام بێت بەڵێ، پارتی هەڵوێست و بەدیلی هەیە و دەرچەیەك دەبێت بۆ رزگاربوون.
