پاشئەوەی سامان بەرزنجی وەزیری تەندروستی حكومەتی هەرێمی كوردستان رایگەیاند كە حاڵەتێكی گوماناوی تای خوێنبەربون لە زاخۆ تۆمار كراوە، بە فەرمی تۆماركردنی یەكەمین حاڵەت لە دهۆك راگەیەنرا.
ئەفراسیاب موسا بەڕێوەبەری گشتی تەندروستی پارێزگای دهۆك لە پرێس كۆنفرانسێكدا رایگەیاند: ئەو توشبوە دانیشتوی خانەسورە بۆ سەردانكردنی دایك و باوكی هاتوە بۆ كەمپی ئاوارەكانی شنگال، لە یەكەم ساتەوە خراوەتە ژێر چاودێری تەندروستیەوە، دەرمانی تایبەتی پێدەدرێت لە ئێستادا ناتوانین بڕیار لەسەر تەندروستی بدەین كە چۆنە، چونكە ئەم نەخۆشیە تا بنبڕنەكرێت دیار نابێت رەنگە لە كۆتاییدا كاریگەریی لەسەر تەندروستی دابنێت، یاخود بە پێچەوانەوە كەسێك سەرەتا رەوشی باش نەبێت، بەڵام لە كۆتاییدا باشتر بێت، تائێستا نیشانیەكی ئەوتۆی نییە كە جێی مەترسی بێت بەتایبەت كە لە سەرەتاوە چارەسەری بۆ كراوە.
بەڕێوەبەری گشتی تەندروستی پارێزگای دهۆك وتیشی: ئەم نەخۆشیە بەئاسانی ناگوازرێتەوە ئەگەر دەرهاویشتەوە خوێنی نەبێت، لە رێگەی هەناسەوە ناگوازرێتەوە لەوبارەیەشەوە هەموو رێوشوێنێكی پێویستمان گرتۆتەبەر.
