بەهۆی لێدوانەكانی سعودیەوە نرخی نەوتی خاو بەردەوامە لە دابەزین و یەك بەرمیل خاوی برێنت هاتە خوارەوە بۆ 114 دۆلار، بەڵام نەوتی ئۆپێك بە بەرزی ماوەتەوە.
بەپێی راپۆرتە ئابورییەكان لە بازاڕەكانی مامەڵەكردن بە نەوتی خاوەوە، بەرەبەیانی ئەمڕۆ پێنجشەممە یەك بەرمیل خاوی برێنت بە 114 دۆلار و 30 سەنتەوە مامەڵەی پێوە دەكرێت، ئەوەش لەكاتێكدایە پێش چەند رۆژێك گەیشتە زیاتر لە 123 دۆلار.
بەپێی هەمان ئەو راپۆرتانە، هەروەها بەرمیلێك خاوی تەكساسی ئەمریكی هاتووەتە خوارەوە بۆ 113 دۆلار و 20 سەنت و خاوی رێكخراوی ئۆپێكیش بەرزترینە و یەك بەرمیل بەرامبەر 122 دۆلار و 94 سەنتە.
شارەزایان باس لەوە دەكەن، هۆكاری بەرزبوونەوەی نرخی نەوت بەهۆی ئەوەوەیە، دوای بڕیاری سەركردەكانی وڵاتانی ئەوروپا بۆ كەمكردنەوەی نەوتی روسیا بە رێژەی 90% تاوەكو كۆتایی ئەمساڵ، سعودیە ئامادەیی پیشانداوە كە قەرەبووی نەوتی ئەو وڵاتە بكاتەوە لە بازاڕەكاندا.
