بەڕێوەبەرایەتی کەشناسی و بومەلەرزەزانی عێراق رایگەیاند، سبەی پێنجشەممە پلەکانی گەرما لەناوچەکانی عێراق بەرزدەبێتەوە و بەرزترین پلەی گەرماش لە بەسڕە دەبێت کە دەگاتە 49 پلەی سیلیزی.
بەڕێوەبەرایەتی کەشناسی و بومەلەرزەزانی عێراق ئەمڕۆ چوارشەممە لەراگەیەنراوێکدا باسی لەوەشکردوە، سبەی لە بەغدا پلەی گەرما 48، بەسڕە و میسان 49 پلە و شاری سلێمانیش نزمترین پلەی گەرمی دەبێت کە 41 پلەی سیلیزی دەبێت.
ئاماژەی بەوەشکردوە، هۆکاری بەرزبونەوەی پلەکانی گەرماش ئەوەیە ھەرێمی کوردستان و ناوچەکە دەکەونە ژێر کاریگەری نزمەپاڵەپەستۆیەکی گەرم کە لەناوچەکانی رۆژئاوای عێراق و سوریا کاریگەرییەکەی قوڵدەبێتەوە، پێشبینیش دەکرێت کاریگەری ئەو شەپۆلی گەرمایە لە سەرەتای ھەفتەی ئایندەدا زیاتر ببێت.
بەگوێرەی پێشبینی شارەزایانی کەشناسی، ھەر لە ئەنجامی کاریگەری ئەو نزمەپاڵپەستۆ گەرمیەش، لە رۆژی هەینییەوە شەپۆلێکی مامناوەند بۆ چری خۆڵبارین لە بیابانەکانی سوریاوە ڕودەکاتە وڵاتی تورکیا و کاریگەری لەسەر ھەرێمی کوردستان نابێت و تەنھا کەمێک ناڕونی لە سەر ئاسمانی ھەندێ ناوچەی رۆژئاوای پارێزگای دھۆک دەبێت.
