سەرۆكی لیژنەی سوتەمەنی لەئەنجومەنی پارێزگای سلێمانی رایگەیاند: حكومەتی هەرێم دادپەروەریی ناكات لە دابینكردنی بەنزین بۆ پارێزگاكانی هەرێمی كوردستان.
كەریم عەلی سەرۆكی لیژنەی سوتەمەنی لەئەنجومەنی پارێزگای سلێمانی لە پرێس كۆنفرانسێكدا رایگەیاند: هیچ بیانویەك نیە بۆ دابینكردنی بەنزین، چونكە حكومەتی هەرێم نەوتی خاو دەدات بە پاڵاوگەكانی سنوری هەولێرو بڕی یەك ملیۆن لیتر بەنزین دەدرێت بەناوشاری هەولێرو قەزاو ناحییەكانی و بۆ پارێزگای دهۆكیش بڕێكی بۆ دەنێرێت، بەڵام بۆ سنوری پارێزگای سلێمانی وەك ئەوەی هەرێمێكی ترو ناوچەیەكی تر بێت یەك لیتری بۆ نانێرێت لەكاتێكدا یاسای بەركارمان هەیە بۆ ئەم بابەتە.
سەرۆكی لیژنەی سوتەمەنی پارێزگای سلێمانی وتیشی: پێویستە ئەوانەی نوێنەرایەتی سلێمانی دەكەن لە حكومەتی هەرێم جدی تربن و داوا لە قوباد تاڵەبانی جێگری سەرۆك وەزیران دەكەم پشكی سلێمانی دابین بكەن وەكو لیژنەی سوتەمەنی لە ئەنجومەنی پارێزگاش چیمان پێكرابێت كردومانە، بەڵام گوێمان لێناگیرێت.
راشیگەیاند: حكومەت رێگاكان داناخات لەسەر گرانبونی نرخی بەنزین و چاودێری نرخ ناكات، بۆیە چاوەڕوان دەكرێت نرخی بەنزین گران و گرانتر بێت.
كەریم عەلی باسی لەوەشكرد: رۆژانە پەیوەندیمان لەگەڵ لایەنە پەیوەندیدارەكاندا هەیە، ئەو بەنزینەی ئێستا لەهەولێر بەناوی 690 دینارییەوە دابەشدەكرێت بەرهەمی ناوخۆییەو دەدرێت بە پاڵاوگەكان، لەسنوری هەولێردا نزیكە یەك ملیۆن لیتر رۆژانە دابەشدەكرێت هیچ لیترێك بۆ سنورەكانی سلێمانی و هەڵەبجەو گەرمیان و راپەڕین نایەت.
