محەمەدی حاجی مەحمود سكرتێری حزبی سۆسیالیست دیموكراتی كوردستان دەڵێت، لە كۆبوونەوەی لایەنە سیاسییەكان، پارتی و یەكێتی لەسەر ئەوە كۆكبوون كە كۆمسیۆن ناتوانێت لە وادەی خۆیدا هەڵبژاردن ئەنجام بدات.
محەمەدی حاجی مەحمود بە دەنگی ئەمریكای وتووە، چونكە یەكێتی و پارتی لە كۆبوونەوەی لایەنە سیاسیەكان لە سەرۆكایەتی هەرێم كۆكبوون لەسەر ئەوەی كە كۆمسیۆن ناتوانێت ئەمساڵ هەڵبژاردن ئەنجام بدات، ئەو دوو حزبە هیچ موناقەشەیەكی یەكتریان نەكرد و كۆكبوون لەگەڵ یەك، دیاربوو پێشتر كۆبونەوەتەوە و گفتوگۆیان كردووە.
ئاماژەی بەوەشداوە، هەموو لایەنەكان لە كۆبوونەوە بە حەزەرەوە قسەیان دەكرد، نێردەی نەتەوە یەكگرتووەكانیش لای گرنگ بوو كە هەڵبژاردن بكرێت و پێی وابوو، هیچ بیانوویەك نییە بۆ دواكەوتنی هەڵبژاردن.
سكرتێری حزبی سۆسیالیس لە بەشێكی تری قسەكانیدا وتویەتی، ئەوەی ئەو لێی تێگەیشت هەڵبژاردن ئەمساڵ ناكرێت، بەڵكو دەكەوێتە ساڵی داهاتوو، رەنگە بكەوێتە بەهاری 2023.
