پرۆژەیەك بۆ دانەوەی قەرزەكانی حكومەت كە لەلای هاووڵاتیانە لەرێگەی پاشەكەوتی موچەوە بدرێنەوە.
كاروان گەزنەیی ئەندامی پەرلەمانی كوردستان لە پرێس كۆنفرانسێكدا رایگەیاند: وەك فراكسیۆنی سەوز لە پەرلەمانی كوردستان چەند پرۆژە یاسایەكیان پێشكەشی سەرۆكایەتی پەرلەمانی كوردستان كردوە، یەكێك لەوانە پرۆژە یاسای لە بریەكخستن (مقاصە)یە كە دەتوانێت هاوكارێكی باشی موچە خۆرانی هەرێم بێت، جگە لەوەی كە پێشتر لەیاسای چاكسازی هەوڵمانداوە كە تەواوی پاشەكەوتی موچەی فەرمانبەرانی هەرێم بەگەڕێنینەوە لە رێگەی یاساوە.
وتیشی: ئێستا هەوڵدەدەین ئەو قەرزانەی حكومەتی هەرێم كە لەلای هاوڵاتیانەو ئەوانەی هاووڵاتیانیش كە لەلای حكومەتی هەرێمە بریەكیان بخەین.
گەزنەی وتیشی: ئێستا حكومەتی هەرێمی كوردستان قەرزی كارەبای ماڵان 312 ملیار دیناری لای هاوڵاتیانە، هی بانكە بازرگانیەكانیش وەك قەرزی نیشتەجێبون 157 ملیارەو هاوسەرگیری 521 ملیار دینارە كە كۆی گشتی دەكاتە یەك ملیار دۆلار، بەڵام لە بەرامبەردا موچەخۆرانی هەرێمی كوردستان بڕی 10 ملیارو 395 ملیۆن و 170 هەزار دۆلاریان لای حكومەتە، هەوڵمانداوە كە ئەمانە لەرێگەی یاساوە بچەسپێنین تا موچەخۆران پاشەكەوتی موچەیان بۆ بگەڕێنرێتەوە، بەڵام بەمەرجێك ئەو هاووڵاتیانەی كە مەبەستیانە سودمەندبن رێژەی بریەكخستنەكە زیاتر نەبێت 30%.
وتیشی: پێویستە ئەم بریەكخستنە ئارەزومەندانە بێت و موچەخۆر بە خواستی خۆی داوا بكات بەشێك لەو قەرزانە لە پاشەكەوتی موچەكەی بدرێنەوە بۆئەوەی كە لەداهاتوودا حكومەت رەوشی دارایی باشبوو كە ئێستاش پێمانوایە باشە ئەو پارەیە بگەڕێنێتەوە بۆ موچەخۆران.
