ئەندامێكی ئەنجومەنی نوێنەرانی عیراق لەسەر فراكسیۆنی پارتی دیموكراتی كوردستان رایدەگەیەنێت، پێشنیارێكی نوێ هەیە لەبارەی میكانزمی وەرگرتنی پۆستەكان لە بەغدا.
شەریف سلێمان ئەندامی ئەنجومەنی نوێنەرانی عیراق بە ئاژانسی هەواڵی عیراقی راگەیاندوە، گفتوگۆكان بەردەوامن لەنێوان پارتی و یەكێتیی نیشتمانیی كوردستان لەبارەی پۆستی سەرۆك كۆماری داهاتوی عیراقەوە، بەڵام تائێستا نەگەیشتونەتە چارەسەری كۆتایی.
راشیگەیاندوە، پێكهاتەی كورد موڵكی هیچ حزبێك نیە لەو حزبانەی بونیان هەیە، ئەگەر بێتو نەگەیشتنە چارەسەر بۆ پۆستی سەرۆك كۆمار ئەوا بە رێككەوتن لەگەڵ پێكهاتەكان و نوێنەرەكانیاندا لەناو پەرلەمان یەكلایی دەبێتەوەو بۆ پۆستەكانی تریش بەوشێوەیەیە.
ئەو ئەندامەی ئەنجومەنی نوێنەران باسی لەوەشكردوە كە میكانزمێكی نوێ پێشنیار كراوە بۆ دوای جەژنی قوربان كە پشتدەبەستێت بە شایستەی هەڵبژاردن بۆ سەرجەم پێكهاتەكان لە خۆكاندید كردن و وەرگرتنی پۆستەكان، بەڵام لەگەڵ وەرگرتنی شایستەی هەڵبژاردن بۆ هەمو حزبێكی براوە بە رەچاوكردنی وەرگرتنی پۆستەكان، ئاماژەشیكردوە كە پارتی پابەند بوە بە دانیشتنەكانی پەرلەمان و دەستورەوە لە پرۆسەی سیاسی عیراق لەگەڵ سەرجەم لایەنەكاندا بەردەوامبوە بۆ پێشختنی پرۆسەی سیاسی.
