نێچیرڤان بارزانی سەرۆكی هەرێمی كوردستان رایگەیاند: جموجوڵ و بەهێزبونەوەی داعش و فراوانبونی هێرش و پەلامارەكانیان، هەڕەشەی راستەقینە لە ئاسایش و سەقامگیریی تەواوی عیراق دەكەن.
لە راگەیەنراوێكدا كە كۆپیەكی دەست رادیۆی نەوا كەوتوە، نێچیرڤان بارزانی رایگەیاندوە، زنجیرە پەلاماری شەوی رابردوی داعش لە سنوری بەغدا، دیالە، سەڵاحەدین و كەركوك بۆ سەر هێزە چەكدارەكان و پۆلیسی فیدراڵی عیراق كە حەوت شەهیدو زیاتر لە بیست برینداری لێكەوتەوە زەنگی مەترسییەكی جدیە.
راشیگەیاندوە، جموجوڵ و بەهێزبونەوەی داعش و فراوانبونی هێرش و پەلامارەكانی، هەڕەشەی راستەقینە لە ئاسایش و سەقامگیریی تەواوی عیراق دەكەن كە پێویستە بە جدی هەڵوەستەی لەسەر بكرێت و وەڵامی یەكلاكەرەوەی بدرێتەوە.
سەرۆكی هەرێم لەبەشێكی تردا ئاماژەی بۆ ئەوە كردوە، بۆ بەرەنگاربونەوەی ئەو هەڕەشانەی داعش پێویستە هاریكاری و هەماهەنگیەكی كاراتر لەنێوان سوپاو هێزە چەكدارەكان و پێشمەرگەو دەزگا ئەمنییەكانی عیراق و هەرێمی كوردستاندا بكرێت، هەروەها پێویستە پشتگیری هاوپەیمانی نێودەوڵەتیی دژی داعش بۆ عیراق و هەرێمی كوردستان بەردەوام بێت، بارودۆخی ئەمنی و سیاسی عیراق، هاریكاری و كاری هاوبەش و پێكەوەیی لە تەواوی هێزو لایەنە عیراقییەكان دەخوازێت بۆئەوەی هەموان پێكەوە سەختییەكان تێپەڕێنن و چیتر دۆخی ئاڵۆزیی سیاسی نەبێتە هۆكاری تێكچونی ئاسایش و سەقامگیری و بەهێزبونەوەی زیاتری داعش.
