ئەندامێکی لیژنەی دارایی پەرلەمانی کوردستان دەڵێت، پارەی مووچەی مانگی تەممووز ئامادەیە، هەرچەندە ئەمساڵ تەنیا دوو جار بەغدا 200 ملیارەکەی ناردووە، ئەو پەرلەمانتارە دەڵێت: “پارەکەی بەغدا نەیەت، گرفت بۆ مووچەخۆرانی سلێمانی دروستدەبێتەوە”.
رۆژی یەکشەممە 31ی تەممووزی 2022، بەڵێن ئیسماعیل، ئەندامی لیژنەی دارایی پەرلەمانی کوردستان ڕایگەیاند : “بەشی زۆری پارە بۆ دابەشکردنی مووچەی مانگی تەممووز ئامادەیە؛ لە هەفتەی داهاتووەوە دابەشکردنی مووچەی مانگی تەممووز دەستپێبکات”.
بەڵێن ئیسماعیل کە پەرلەمانتارە لە فراکسیۆنی گۆڕان، ئاماژەی بەوەش کرد کە ئەگەر 200 ملیارەکە لە بەغداوە بۆ هەرێمی کوردستان نەنێردرێت، ئەوە بۆ مووچەی مانگی تەممووزیش کێشە بۆ مووچەخۆرانی هەرێمی کوردستان دروستدەبێت.
سەبارەت بە ناردنی 200 ملیارەکە لە بەغداوە، رۆژی شەممە 30ی تەممووزی 2022، فارس عیسا، سەرۆکی نوێنەرایەتیی حکومەتی هەرێمی کوردستان لە بەغدا ڕایگەیاند : “هیچ یاساییەک نییە بۆ بڕینی قووتی خەڵکی، بەڵام جێگەی داخە ئەو ئەقڵیەتەی کاروباری وڵات بەڕێوەدەبات دەست بۆ هەموو شتێک دەبات، تەنانەت بڕینی قووتی خەڵکیش، بەتایبەتی خەڵکی هەرێمی کوردستان.
هەوڵی ئێمە لەگەڵ لایەنی عێراقی بەردەوامە بۆ ئەوەی ناردنی ئەو 200 ملیار دینارە بەردەوام بێت تاوەکو بودجە پەسند دەکرێت. دادگە بڕیاریداوە کە نەناردنی ئەو 200 ملیار دینارە نایاساییە، واتا دەبێت بەردەوام بێت”.
رۆژی شەممە 30ی تەممووزی 2022، سەرچاوەیەک لە وەزارەتی دارایی و ئابووریی هەرێمی کوردستان راگەیاند، بەهۆی چارەسەرنەکردنی گرفتی دابەشکردنی مووچە لە سنووری سلێمانی و نەگەڕانەوەی داهاتی ئەو پارێزگایە، دابەشکردنی مووچەی مانگی تەممووز دوادەکەوێت.
