سەرۆكی هەرێمی كوردستان دەڵێت، تاوەكو ئێستا دوو هەزار و 717 ئێزدی رفێندراو ماون و هێستا 325 هەزار ئێزدی لە كەمپەكان ئاوارەن، 100 هەزار ئێزدیش لە وڵاتانی جیهان بوونەتە پەنابەر.
نێچیرڤان بارزانی لە وتارێكدا لە مەراسیمی 8ەمین ساڵیادی جینۆسایدكردنی ئێزدییەكان وتی، ئەمڕۆ هەمومان بەیەكەوە بەدڵێكی زۆر خەمناكەوە یادی هەشتەمین ساڵیادی جینۆسایدی شنگالییەكان دەكەینەوە، كە گەورەترن كارەساتی سەدەی بیست و یەكە بەسەر ئێزدییەكان و گەلی كوردستاندا هات.
ئاماژەی بەوەشدا، ئەو كارەساتەی داعش بووە لاپەڕەیەكی دیكەی خوێناوی لە مێژوی كوردستان و فەرمانێكی دیكەیە لەسەر ئێزدییەكان، 5 هەزار ژن و منداڵ و پیاوی ئێزدی بوونە قوربانی.
سەرۆكی هەرێم باسی لەوەش كردووە، تاوەكو ئێستا 2 هەزار و 717 ئێزدی رفێندراو ماون و هێستا 325 هەزار ئێزدی لە كەمپەكان ئاوارەن، 100 هەزار ئێزدیش لە وڵاتانی جیهان پەنابەربوونە، زۆرینەی شنگال وێران بووە و خەڵكەكەی بێ ماڵ و حاڵ ماونەتەوە.
