سەرۆكی پەرلەمانی كوردستان وەڵامی ئەنجومەنی دادوەریی هەرێمی كوردستانی دایەوە كە ناتوانرێت رێكاری یاسایی بەرامبەر پەرلەمانتار عەبدولستار مەجید سەرۆكی فراكسیۆنی كۆمەڵی دادگەری بگیرێتەبەر.
لە وەڵامی نوسراوێكدا رێواز فایەق بە ئەنجومەنی دادوەری راگەیاندوە، ناتوانرێت رێكاری یاسایی بەرامبەر عەبدولستار مەجید بگیرێتەبەر بۆ لابردنی پارێزبەندی، چونكە ناوبراو ئەگەر لەكاتی دەوامدابوو ئەوا پێویستە بە دەنگی زۆرینەی ئەندامانی پەرلەمان لێی وەربگیرێتەوەو ئەگەر لەكاتی پشوی پەرلەماندا بوو ئەوا سەرۆكی پەرلەمان دەتوانێت پارێزبەندی لەسەر هەڵبگرێت.
رێواز فایەق ئاماژەشیكردوە، پارێزبەندی لەسەر پەرلەمانتاری ناوبراو لانەبراوە لەبەرئەوە ناتوانرێت رێكاری یاسای دژی بگیرێتەبەر تەنها لەحاڵەتی گرتنی راستەوخۆ بۆ ئەنجامدانی تاوانێكی بینراودا نەبێت.
لەلایەن خۆشیەوە عەبدولستار مەجید بڵاویكردۆتەوە، زۆر بێمنەت و بێباكە لە چون بۆ دادگاو پێویستی بە پارێزبەندی نیە، چونكە دەزانێت چیكردوەو چی وتوە، بەڵام تێنەگەیشتوە ئەوەی سكاڵاكەی كردوە كێیە بە وتەی ئەو نەیوێراوە ناوی بنوسێت كە لە ڕوی یاساییەوە پێویستە سكاڵاكار دیار بێت.
