جەعفەر ئیمینكی ئەندامێكی مەكتەبی سیاسی پارتی دەڵێت، ناكرێت یەكێتی لەبەهانە بگەڕێت بۆ باسكردن لە پرسی كشانەوە لە حكومەت و دوو ئیدارەیی، ناشكرێت هەموو پرسەكان ببەسترێنەوە بە حكومەتەوە.
جەعفەر ئیمینكی لە چاوپێكەوتنێكی تەلەفزیۆنیدا رایگەیاندووە، بێسەروبەرییەك هەیە لە پەیوەندییەكان و ئەوەش پەیوەندی بەو تیمەی یەكێتییەوە هەیە كە پەیوەندییەكان بەڕێوەدەبەن، چونكە ناكرێت هەموو پرسەكان ببەسترێنەوە بە حكومەتەوە كە كاری خۆی دەكات، ئەو گرژییەی دروست بووە پەیوەندی بە هەندێك دۆسیەی ئەمنی هەیە و نابێت لایەنەكان ببەنە بەشێك لەو دۆسیانە و پێویستە حكومەت كاری خۆی بكات.
ئەو بەرپرسەی پارتی رونیشیكردووەتەوە، پێشتر چەند كێشەیەك هەبووە و هەوڵی چارەسەركردنی دەدرا، لەوانە كوژرانی كادیرێكی پارتی لەچەمچەماڵ، بوونی فەوجێك لەسنوری چەمچەماڵ كە رێككەوتن كرا ببرێتە پردێ، بەڵام كوژرانی هاوكار جاف لەناوجەرگەی هەولێر روداوێكی زۆر گەورە بوو.
ئیمنكی وتوشیەتی، نابێت یەكێتی لەبەهانە بگەڕێت بۆ ئەوەی باسی كشانەوە لە حكومەت و دوو ئیدارەیی بكات، ئەم مەسەلانە لەو ئاستەدا نین ئەگەر بمانەوێت پەیوەندییەكان بەرەو باشتر ببەین.