مامۆستایانی وانەبێژ بایكۆتیان راگەیاند

واژۆ

مامۆستایانی وانەبێژ لە چەند ناوچەیەكی هەرێمی كوردستان بایكۆتیان راگەیاند و ناچنەوە هۆڵەكانی خوێندن و جەخت لەوەش دەكەنەوە، ئامادەنین پرسیاری وەرزی یەكەمیش رادەست بكەن.

مامۆستایانی وانەبێژ لە سلێمانی لە كۆنگرەیەكی رۆژنامەوانیدا رایانگەیاند، دوای بێئومێدبونیان لە رادەستكردنی زیاتر لە 530 یاداشت بە بەلایەنی پەیوەندیدار و دانیشتن لەگەڵ سەرۆكی پەرلەمان ‌و ئەندامانی لیژنەی پەروەردە لەپەرلەمان ‌و وەزیری پەروەردەو سەرۆكی ئەنجومەنی راژە، تاوەكو ئەم چركە ساتە هیچ هەوڵێكی كرداریی ‌و دڵخۆشكەریان بۆ مامۆستایانی وانەبێژ نەبیست ‌و نەبینی.
جەختیان لەوەش كردووەتەوە، چاوەڕوانییان بۆ ئەوەی كێشەی مامۆستایانی وانەبێژ بەگفتوگۆ و كۆبونەوە چارەسەر بكرێت كۆتایی پێهات، بۆیە مامۆستایانی وانەبێژ باجی بێخەمی حوكمەت بۆ كەرتی پەروەردە نادەن‌ و چیدی باری گرانی پەروەردە بە شایستەی ناشایستە راناكێشن.
مامۆستایانی وانەبێژ هێمایان بۆ ئەوەش كردووە، لەمڕۆ سێشەممەوە بایكۆتی مامۆستایانی وانەبێژیان راگەیاندووە و ئامادەش نین پرسیاری وەرزی یەكەم رادەستی خوێندنگەكان بكەن.