واژۆ
سەڵاحەدین بابەكر كارگێڕی ئەنجومەنی جێبەجێكردنی یەكگرتوی ئیسلامی كوردستان ئاماژە بەوە دەدات، پارتی و یەكێتی گەیشتونەتە ئەو بڕوایەی ناتوانن بێ یەكتری ئیدارەیەكی سەركەوتوانەی هەرێم بدەن.
سەڵاحەدین بابەكر بە دەنگی ئەمریكای وتووە، لە سەردانەكەیاندا بۆ لای یەكگرتوو شاندی پارتی باسیان لەوەكرد لە دوای كۆنگرەی حزبەكەیانەوە، بڕیاری هەڵدانەوەی لاپەڕەی نوێ و پێداچونەوەیان داوە بە پەیوەندییەكانیان لەگەڵ سەرجەم لایەنەكان، راشكاوانە بە شاندى پارتییان وت كە كێشەكانتان لەگەڵ یەكێتی چارەسەر بكەن، چونكە كاریگەری خراپی دەبێت لەسەر هەرێمی كوردستان و خەڵكەكەی.
رونیشیكردووەتەوە، هەروەها لەكاتی سەردانەكەیدا بۆ لای یەكگرتوو بە قوباد تاڵەبانییان وتووە كە پێویستە لەگەڵ پارتی كێشەكانیان چارەسەر بكەن تاوەكو لەوە زیاتر گرفت و قەیران بۆ خەڵك دروست نەبێت و لەبری ململانێ خزمەتی خەڵك بكەن، یەكێتی و پارتی گلەییان لەیەكتری هەبوە، پێمانوتن وەكو هێزێكی ئۆپۆزسیۆن حەز دەكەن كێشەی نێوانیان چارەسەر بكەن،چونكە خەڵكی كوردستان باجی ئەم بارودۆخە دەدات.
بە وتەی ئەو بەپرسەی یەكگرتوو، هەردولایان گەیشتبوونە ئەو بڕوایەی ناتوانن بێ یەكتری، ئیدارەیەكی سەركەوتوانەی هەرێم بدەن و بەرژەوەندییان لە چارەسەركردنی كێشەكانیانە، بەڵام ماوەتەوە سەر ئەوەی چۆن لە كۆبونەوەی نێوانیان ئەم ئیرادەیە بۆ كردار تەرجەمە دەكەن.
