بەشی بومەلەرزەزانی سەربە وەزارەتی گواستنەوەی عیراق ئاشكرای كرد، لە مانگی رابردوودا 22 بومەلەرزە تۆمار كراون و 14یان لە ناوكی خاكی عیراقدا بوون.
بەشی بومەلەرزەزانی عیراق لە بەیاننامەیەكدا بڵاویكردووەتەوە، ژمارەی ئەو بومەلەرزانەی لە مانگی تشرینی یەكەمی رابردوو تۆمار كراون 22 بومەلەرزە بوون، 14 یان لە ناو خاكی عیراقدا روویانداوە و یەكیان لەسەر سنورەكان لەگەڵ ئێران و 7 بومەلەرزەش لە ناو خاكی ئێران و لە نزیك سنورەكانی عیراقدا بوون.
رونیشكراوەتەوە، پلەی بومەلەرزەكان بە پێوەری رێختەر لە نێوان 2 بۆ 3.8 پلە بوون، هەروەها قوڵیەكەشیان لە نێوان 3 بۆ 25 كیلۆمەتر بوون.
سەبارەت بە ناوچەی بومەلەرزەكان هاتووە، زۆرینەیان لە ناوچەكانی “قەزای خانەقین و مەندەلی و ناحیەی سەعدیە لە پارێزگای دیالە بوون”، هەروەها بەشێكیان لە “شاری عەمارەی پارێزگای میسان” و “قەزای رانیە و دەربەندیخان و كەلار لە پارێزگای سلێمانی” و “باكوری خۆرئاوای موسڵ لە پارێزگای نەینەوا” و “باكوری كەركوك” بوون.
