لیوا یەحیا رەسوڵ وتەبێژی فەرماندەی گشتی هێزە چەكدارەكانی عیراق دەڵێت، ئۆپەراسیۆنە هاوبەشەكەی هێزەكانی پێشمەرگە و سوپای عیراق پەیامێكی ئەرێنییە بۆ یەكخستنەوەی هێزەكان و ئاسایشی هەرێمی كوردستان بەشێكە لە ئاسایشی عیراق.
لیوا یەحیا رەسوڵ لە گفتوگۆیەكی تەلەفزیۆنیدا سەبارەت بە ئۆپەراسیۆنی هاوبەشی نێوان هێزەكانی پێشمەرگە و سوپای عیراق بۆ راوەدونانی پاشماوەكانی داعش كە ئەمڕۆ چوارشەممە دەستی پێكرد وتویەتی، ئۆپەراسیۆنەكە لە مەخمورەوە دەستی پێكردووە و مستەفا كازمی فەرماندەی گشتی هێزە چەكدارەكان لە نزیكەوە چاودێری دەكات.
رونیشیكردووەتەوە، ئۆپەراسیۆنی هاوبەش پەیامێكی گەورەی پێكەوە كاركردنی تێدایە و پەیامێكی ئەرێنییە بۆ یەكخستنەوەی هێزەكان.
وتەبێژی فەرماندەی گشتی هێزە چەكدارەكانی عیراق لە بەشێكی تری قسەكانیدا جەختی لەوە كردووەتەوە، ئاسایشی هەرێمی كوردستان بەشێكە لە ئاسایشی عیراق، هەروەها پێشمەرگە لە دەستوردا دانی پێدا نراوە و بەشێكە لە سیستمی بەرگری عیراق.
