عومەر گوڵپی ئەندامی لیژنەی دارایی لە پەرلەمانی كوردستان دەڵێت، پیشەیەك بە سەرمایەی دوو ملیۆن دینار باجی لێ دەسەنرێت، بەڵام دوو ملیار دۆلار بەخشراوە لە دانی باج، ساڵ لەدوای ساڵ داهاتی باج كەمیكردووە ئەوەش بەهۆی ئەوەی حكومەت بەبێ یاسا دەستكاری باجی كرد.
عومەر گوڵپی لە ئەكاونتی خۆی لەتۆڕی كۆمەڵایەتی تویتەر نوسیویەتی، بە پێی ژمارە و داتاكانی حكومەت خۆی تێكڕای داهاتی باج بۆ هەر مانگێك لە ساڵی 2019 بریتی بووە لە 51 ملیار دیناری مانگانە، بۆ ساڵی 2020 بریتی بووە لە 45 ملیار و تێكڕای داهاتی باج بۆ هەر مانگێك لە ساڵی 2021 كەمبووەتەوە بۆ 40 ملیار.
ئاماژەی بەوەشداوە، واتە وێڕای ئەوەی حكومەت بانگەشەی ئەوە دەكات كە باجیان رێكخستووەتەوە و داهاتیان زیادكردووە، بەڵام ساڵ بە ساڵ داهاتی باج كەمی كردووە، هەڵەی گەورەی حكومەت ئەوەیە بە پێچەوانەی دەستور، بەبێ یاسا دەستكاری باجی كرد، لە كاتێكدا نابێت بەبێ بوونی یاسا نە كەس لە باج ببەخشرێت نە كەس باجی زیاتری بخرێتە سەر! بەڵام حكومەت تەنها بە بڕیاری خۆی، دەستی بۆ زیادكردن و سەپاندنی باج برد.
ئەو پەرلەمانتارە باسی لەوەش كردووە، باج لەسەر ئاستەكانی خوارەوە و پیشە و بازرگانی بچوكی نێوبازاڕ زیاد كرا یاخود توند كرا، لە كاتێكدا سەدان كۆمپانیا و بازرگانی گەورە بەخشراون لە باج و باجیان لێ وەرناگیرێت، یاخود خۆیان لە باج دەدزنەوە بەهۆی نفوسیان لە حزبەكانی دەسەڵات كە بەشێكی زۆریان كۆمپانیای بەرپرسانن.
گوڵپی لە بەشێكی تری قسەكانیدا وتویەتی، حكومەت بەشێوەیەك لە باج تێگەیشتووە تەنها بۆ زیادكردنی داهاتە، لە كاتێكدا بۆ بەدیهێنانی دادپەروەرییە لەنێوان هەژار و دەوڵەمەندەكان، هەربۆیە سیاسەتی هەڵەی باجی حكومەت لە سێ ساڵی ڕابردوو بووەتە هۆی بارگرانی لەسەر خەڵك و گرانبوونی زیاتری شتومەك.
