خوێندكارانی عیراقی لە لوبنان داوا لە سەرۆكایەتیەكانی عیراق دەكەن بەهانایانەوە باچن، چونكە 17 كەسیان تووشی نەوەی ئۆمیكرۆنی كۆرۆنا بوون و بارودۆخی هەندێكیان خراپە و خزمەتگوزاری تەندروستیش لە لوبنان زۆر خراپە.
ئەو خوێندكارانە لە بانگەوازەكەیاندا نوسیویانە، 17 خوێندكاری عیراقی لە بوبنان تووشی نەوەی ئۆمیكرۆنی كۆرۆنا بوون و بارودۆخی 6یان خراپە و لە نەخۆشخانەكانی “بەیروت” و “جونیە”ی لوبنان داغڵ كراون.
رونیشكراوەتەوە، بەهۆی بڕیارە نادروستەكانی وەزارەتی خوێندنی باڵا و توێژینەوەی زانستی عیراقەوە ژیانی خوێندكارە عیراقییەكان لە لوبنان لەمەترسیدایە، داوا لە سێ سەرۆكایەتیەكە دەكەن بەپەلە بێنە سەر هێڵ و فشار بخەنە سەر ئەو وەزارەتە بۆ رزگاركردنیان لە مەرگ.
لە بەشێكی تری بانگەوازەكەدا هاتووە، مردن لەناو كەسوكاردا زۆر باشترە لە مەرگی غەریبی، خزمەتگوزاری لە لوبنان زۆر خراپە و كەرتی تەندروستیش بەهۆی دۆخی خراپی ئابورییەوە لەو وڵاتە لە خراپترین ئاستدایە.
