هۆشیار زێباری رایگەیاند: بڕیاری دادگای فیدراڵی عیراق سیاسییەو ئەوانەی لەپشتیەوەن دەیانناسن و سەركردایەتی پارتیش لەوبارەیەوە كۆدەبێتەوە.
لەدوای بڕیارەكەی دادگای فیدراڵی عیراق، هۆشیار زێباری كاندیدی رەتكراوە بۆ پۆستی سەرۆك كۆماری عیراق لە پرێس كۆنفرانسێكدا رایگەیاند: كاندیدی مەسعود بارزانی سەرۆكی پارتی دیموكراتی كوردستان بوو ئەو پۆستە بۆ من هەموو دنیا دەهێنێت، ئەو بڕیارەی دەرچوە بڕیارێكی سیاسییە بە ئیمتیاز دەركراوە بەبێ پەردە، ئێمە هەموو داواكارییەكی یاساییمان رادەستكردوەو دۆسیەكەمان داخستوە، مایەوە بڕیارێكی سیاسی بدەن و وا ئەم بڕیارەیاندا.
زێباری وتیشی: زۆر ئاماژە هەبون كە هەوڵێكی وا لە ئارادایە وتمان نیەت باشی پیشاندەدەین لەگەڵ هەموو لایەك، لەبەرئەوەی هەموو مەرجەكانی سەرۆك كۆمارمان تیادایە بەپێی دەستورو بەپێی یاسا بەهەموو قۆناغەكانی خۆكاندیدكردنیش رۆیشتین هەموو ئەو كەیسانەی بۆمان دروستكرابون لە نەزاهە، لێپرسینەوەو دادوەری، خوێندنی باڵا، بەڵگەی تاوان، هیچ تاوانێكمان لەسەر نەبوە، كاتی خۆی كە پەرلەمانی عیراق بانگهێشتیان كردم و دەستیان پێ لەكاركێشامەوە بڕیارێكی سیاسی بوو بە دانپیادانانی هەموو لایەك هیچ ئیدانەیەكی یاسایی و دادییمان لەسەر نەبوە.
زێباری وتیشی: چوینە دادگاو وتەمان لێوەرگیراو كێشەكانمان داخست، بۆیە دەڵێم بڕیارێكی سیاسییەو سەركردایەتیمان پێداچونەوە بەم بابەتەدا دەكات و رەنگە مەسەلەكە لەمن گەورەتر بێت.
لەوەڵامی پرسیارێكیشدا هۆشیار زێباری وتی: هێزی سیاسی هەیە لەپشتی ئەم بڕیارە ئەوەندە نەزان نین و دەیانناسین، بەڵام كاتی نەهاتوە دەستنیشانی بكەین چ لایەنێكی لە پشتەوە بوە، ئەمە پێداچونەی پێویستەو لەوبارەیەوە رۆژی دووشەممە 14-2 كۆبونەوەی لەسەر دەكەین.
