ژمارەیەك ئەندامی پەرلەمانی عیراق داوا دەكەن باڵیۆزی توركیا لە عیراق دەربكرێت و قەبارەی ئاڵوگۆڕی بازرگانیش سنوردار بكرێت، هەڕەشەی وەڵامدانەوەش دەكەن.
ئەو پەرلەمانتارانە لە كۆنگرەیەكی رۆژنامەوانیدا ئیدانەی بۆردومانەكەی توركیایان كرد بۆ سەر ناوچەیەكی گەشتیاری پارێزگای دهۆك كە بووە هۆی كوژرانی 9 كەس و برینداربوونی زیاتر لە 20 كەسی دیكە و جەختیان لەوە كردەوە، داوا دەكەن باڵیۆزی توركیا لە عیراق دەربكرێت.
لە بەشێكی تری قسەكانیاندا هاتبوو، داواش دەكەن قەبارەی ئاڵوگۆڕی بازرگانی لەگەڵ توركیا سنوردار بكرێت و هەڵسوڕێنەری كارەكانی عیراقیش لە توركیا بانگ بكرێتەوە، پێویستە دەستوەردانی نێودەوڵەتیش بكرێت.
پەرلەمانتاران هەڕەشەی ئەوەش دەكەن، ئەگەر سێ سەرۆكایەتییەكە وەڵامیان نەبێت بۆ ئەو دەستدرێژییانەی توركیا، ئەوا وەڵامی تریان دەبێت.
