لیندسی گراهام ئەندامی ئەنجومەنی پیرانی ئەمریکا رایگەیاند، لە داهاتوودا وڵاتەکەی ناچار دەبێت بگەڕێتەوە بۆ ئەفغانستان، هەر وەک چۆن لە عێراقیش ئەو کارەی کرد.
گراهام لە لێدوانێکدا بۆ بی بی سی باسی لەوەکردوە، تاڵیبان هیچ نەگۆڕاوە و ناتوانێت خۆی لە گەڵ جیهانی سەردەمدا بگونجێنێت، بۆیە ئەمریکا ناچار دەبێت بۆ رێگری لە مەترسییەکانی ئەو بزوتنەوەیە بگەڕێتەوە بۆ ئەفغانستان.
ئەو ئەندامەی ئەنجومەنی پیرانی ئەمریکا باسی لەوەشکردوە، هەروەک چۆن دوای سەرهەڵدانی داعش لە عێراق ئەمریکا ناچار بوو بگەڕێتەوە و پێنج هەزار سەرباز لەو وڵاتەدا جێگیر بکات، هەر بەو جۆرەش پێویست دەکاتەوە سەربازەکانی بۆ ئەفغانستان رەوانە بکاتەوە.
لیندسی گراهام لەو بڕوایەشدایە بەهۆی بەرەنگاربوونەوەی هاوڵاتیانی ئەفغانستانی و تەشەنەسەندنی ناڕەزایەتیەکانیان لە داهاتوودا، تاڵیبان لاواز دەبێت و ئەمەش دەبێتە دەرفەتێک بۆ داعش بۆ هێرشکردنەسەر ئەو بزوتنەوەیە و بەمەش جارێکی تر ئەفغانستان دەبێتە پەناگەیەک بۆ گروپە توندڕەوەکان.
