محەمەد رەزا ئال حەیدەر ئەندامی لیژنەی ئاسایش و بەرگریی پەرلەمانی عیراق دەڵێت “لە وڵاتدا سیستمی بەرگری ئاسمانی ئەمریكی و روسیش هەیە، بەڵام بێكەڵكن و سودیان نییە، بۆیە عیراق سیستمی بەرگریی روسی دەكڕێت”.
محەمەد رەزا لەلێدوانێكی رۆژنامەوانیدا وتویەتی “عیراق بۆ پاراستنی ئاسمانەكەی لە هەر دەستدرێژییەكی دەرەكی، سیستمیی بەرگری ئێس 300 یاخود ئێس 400ی روسی دەكڕێت، بۆیە ئەگەر لایەنی ئەمریكی پاڵپشتیی عیراق نەكات لە بنیادنانی سیستمی بەرگریی ئاسمانیدا، ئەوا ئەو سیستمە روسییە دەكڕێت”.
باسی لەوەشكردوە، عیراق پێویستی بە بنیادنانی سیستمێك هەیە بۆ پاراستنی ئاسمانی خۆی لە هەر پێشێلكارییەكی دەرەكی، هەرچەندە لە وڵاتەكەدا سیستمی بەرگریی ئاسمانی ئەمریكی هەیە بەڵام كاریگەری نییە، هەروەها روسیش هەیە، كە تەنها 20 كیلۆمەتر مەوداكەیەتی بۆیە ئەویش كاریگەری نییە.
ئەندامەكەی لیژنەی ئاسایش و بەرگریی پەرلەمانی عیراق تەئكیدی كردوەتەوە، لیژنەكەیان رۆڵی یاسایی و چاودێری دەبینێت بۆ بەرزكردنەوەی مەعنەویاتی هێزە ئەمنییەكان و بەدواداچونی پێداویستی ئەو هێزانە و بڕیاردان لەسەر بودجەی پێویست لە پرۆژەیاسای بودجە و پێشكەشكردنی راوێژ.
